DILI, HEADLINE, POLÍTIKA, SEGURANSA, Uncategorized

Kapasidade aumenta, PR Horta kongratula PNTL

Kapasidade aumenta, PR Horta kongratula PNTL

Prezidente Republika, José Ramos Horta, akompañadu hosi Vise-Ministru Interiór António Armindo, Xefe Estadu Maiór Jenerál F-DTL Tenente Jenerál Falur Rate Laek, Komandante Jerál PNTL Faustino da Costa ho nia vise bainhira halo vizita ba Kuartél Jerál iha Caicoli, sesta (12/08). Imajen Tatoli/António Daciparu

DILI, 12 agostu 2022 (TATOLI)—Prezidente Repúblika (PR), José Ramos Horta, sesta ne’e, hala’o vizita ba Kuartél Jerál Polísia Nasionál Timor-Leste (PNTL) iha Caicoli, Dili, no kongratula instituisaun PNTL tanba membru PNTL sira-nia kapasidade aumenta di’ak.

Prezidente Repúblika, José Ramos Horta, bainhira halo vizita ba Kuartél Jerál PNTL iha Caicoli, sesta (12 agostu 2022). Imajen Tatoli /António Daciparu.

“Ohin, mai vizita Komandu PNTL iha tinan lubuk ida mak hau la mai iha ne’e tanba iha atividade seluk no ha’u haree kompara ho tinan lubun ida ba kotuk progresu barak tebe-tebes. Iha kualidade, profisionalizmu ita-nia polísia iha ekipamentu la’ós sufisiente maibé kompara ho uluk orsamentu jerál Estadu ne’ebé tau mós ba PNTL iha evolusaun di’ak tinan sira nia laran. Nune’e parabéns ba sira hotu-hotu kapasidade PNTL nian tinan sira-nia laran aumenta di’ak loos,” PR Horta hateten ba jornalista sira hafoin vizita Kuartél Jerál PNTL.

Iha vizita ne’e, Xefe Estadu simu direta hosi Vise-Ministru Interiór (MI), António Armindo, no Komandate Jerál PNTL, Komisáriu Faustino da Costa, Segundu Komandate Jerál PNTL, Komisariu Polísia Mateus Fernandes, no kontinua ho parada formatura membru PNTL sira.

Hafoin ne’e, Prezidente Repúblika hala’o vizita ba divizaun sentru integradu jestaun informasaun no investigasaun kriminál, edifísiu informátika téknolojia PNTL, vizita fatin konstrusaun edifísiu Komandu Jerál PNTL foun, ofisina PNTL no biban ne’e superiór PNTL aprezenta fasilidade no ekipamentu servisu instituisaun ne’e nian ba Komandante Supremu Forsa Armada ne’e.

Iha biban ne’e, PR hala’o mós enkontru ho membru Governu ba área tutela, superiór PNTL no akompaña mós komandante PNTL munisípiu sira.

Xefe Estadu nia vizita ne’e, marka prezensa hosi Xefe Estadu Maiór Jenerál F-FDTL, Tenente Jenerál Falur Rate Laek.

PR louva profisionalizmu servisu PNTL nian ne’ebé hatudu komportamentu di’ak kumpre lei ho orden no respeitu direitu umanu.

“Se ha’u halo karik avaliasaun ruma ba atividade sívika, atividade komportamentu PNTL nian hanesan mós F-FDTL nian, ha’u iha esperénsia iha área ida-ne’e observa iha mundu rai lubun ida iha funsaun lubuk uluk ha’u iha ho Nasaun Unida, Ha’u hateten ita-nia polísia iha komportamentu intermu lei ho orden no respeitu direitu umanu ne’e alta klasifikasaun di’ak,” nia dehan.

Nune’e, Xefe Estadu orgulu ho existénsia PNTL nian ne’ebé durante ne’e hala’o nia kna’ar hodi garante seguransa ba sidadaun, mezmu iha problema sempre defísil iha instituisaun ho ema barak hodi bele kontrola buat hotu-hotu, nune’e kontinua enkoraja membru PNTL hotu atu mantein profisionalizmu garante seguransa ne’ebé ho vizibilidade besik liután ba povu hodi garante seguransa hakmatek no trankuilidade.

“Situasaun Timor nian iha ita-nia polísia no forsa bele orgulu balansu pesoál. Ha’u halo iha 2014-2017, ha dirije painel ONU ida naran painel altu nivel ba operasaun paz ONU ida-ne’e tau matan forsa ba pás, forsa polísia rai lubun ida iha mundu no ha’u bele kompara. Purtantu ha’u hatene bele orgullu dalaruma problema balun akontese ne’e normal,” nia hateten.

Horta nota durante vizita ne’e klaru haree ekipamentu PNTL ne’ebé ohin iha espozisaun no esplikasaun balun di’ak no balun modern, maibé balun la funsiona no balun antigu loos ona tenke muda, nune’e hanoin Governu presiza tau atensaun hodi mellora liután.

Governu presiza aloka orsamentu espesiál ba PNTL no F-FDTL

Prezidente Repúblika (PR), José Ramos Horta, hanoin katak Governu tenke tau matán liután ba instituisaun rua hanesan PNTL no F-FDTL, hodi dezenvolve hala’o mós atividade liga enjiñeria, saúde, sosiál no seluk tan direta iha komunidade nia leet.

Prezidente Repúblika, José Ramos Horta, kaer Liman ho ofisiál membru PNTL bainhira hala’o vizita ba Kuartél Jerál iha Caicoli, sesta (12 agostu 2022). Imajen Tatoli/António Daciparu.

“Ha’u sei haree Orsamentu Jerál Estadu (OJE) mai no pontu tuir mai ha’u haree di’akliu se Governu hakarak tau matan liu ba forsa rua ne’e. Ha’u haree mak se bele fó orsamentu espesiál ba sira hodi bele halo mós atividade sosiál, sívika, desportiva barak liután. Tanba iha tempu bainhira Timor laiha konflitu, ita-nia forsa la okupadu ho konflitu armada ruma iha ne’ebé-ne’ebé, PNTL ita-nia polísia la’os busy ho problema seguransa barak loos’’ PR fó hanoin

Entaun sira iha posibilidade atu ajuda komunidade nune’e fó meiu ba sira ekipamentu hanesan enjeneria ou ekipamentu sira seluk hodi ajuda família ka ema ruma iha komunidade presiza derepente hadia uma kakuluk, derepente eskola ida anin huu semo sai kakuluk, organiza atividade sosiál no kulturál ho populasaun, moviliza joven sira kuda ai.

“Entaun forsa rua ne’e bele halo, haree took kria programa espesiál iha forsa rua ne’e nia liman. Se di’ak liután forsa rua ne’e koordena tanba F-FDTL iha unidade enjiñeria ki’ik maibé di’ak. Instituisaun rua ne’e iha unidade médiku bele mós halo prestasaun servisu iha aldeia no suku sira. Ha’u-nia parte fiar halo daudaun ona, purtantu ida-ne’e ha’u apoiu tebes,” nia dehan.

Tuir Konstituisaun Repúblika Demokrátika Timor-Leste (KRDTL) iha artigu 147 (Polísia no forsa seguransa sira), iha alínea 1 hateten polísia sei defende legalidade demokrátiku no garante sidadaun sira-nia seguransa internu, maibé sira labele iha partidu polítiku; Iha alínea 2 haktuir  prevensaun  kriminál tenke hala’o ho respeitu ba direitu umanu; no alinea 3 hateten lei maka sei harii rejime ba polísia no mós forsa seguransa seluk.

Istória PNTL

Polisia Nasionál Timor Leste (PNTL) harii iha tinan 2000 ho metamorfoze sira PNTL nian mak hanesan iha tinan 2000 to’o 2001 Instituisaun Estadu ida-ne’e hanaran Timor-Leste Police Services (TLPS), nune’e hahú 2001 to’o 2002 naran TLPS nakfilak ba East Timor Police Services (ETPS).

Prezidente Repúblika, Ramos Horta, akompaña hosi komandante Jerál PNTL ho Nia vise bainhira halo vizita ba Kuartél Jerál iha Caicoli, sesta (12 agostu 2022). Imajen Tatoli /António Daciparu.

Liuhosi revista PNTL nian www.pntl.tl kona-ba Istória PNTL mensiona katak iha momentu Instituisaun ne’e iha faze ida ba konsolida no buka naran própriu no merese ba nasaun ida-ne’e, maiória iha ema barak inklui joven balun mosu persesaun ida hodi hanoin katak pesoál sira ne’ebé hala’o kna’ar iha tempu 2000-2002 so servisu hodi apoiu no ajuda pesoál ONU nian ne’ebé mak hala’o hela kna’ar ba pas, estabilidade no mantein seguransa iha rai-laran ne’ebé loron ruma depois mandatu ONU nian iha Timor-Leste ramata, instituisaun ida-ne’e mós la eziste tan no Governu Timor-Leste sei estabelese hikas fali instituisaun seguransa ida iha rai-laran.

Maske nune’e, iha 2002 to’o ohin loron Governu Timor-Leste liuhosi Lideransa Ministru Interiór tempu ne’ebá, Rogério Tiago Fátima Lobato, transforma Instituisaun ne’e hodi hanaran Policia Nacional de Timor Leste (PNTL) ne’ebé nafatin moris no la’o to’o ohin loron.

Iha ona progresu barak mak akontese iha PNTL maske sei nafatin enfrenta sasadik sira (dezafiu) balun mak durante prosesu dezenvolvimentu Instituisaun PNTL, nune’e sasadik  balun ne’ebé PNTL enfrenta mak Servisu sistema administrativu inklui servisu sira iha área operasionál PNTL nian.

Hahú hosi tempu UNTAET to’o UNMISET, PNTL uza Regulamentu UNTAET Númeru  22/2001 ne’ebé mai ho estrutura diviza lima (Agente Recruta/RA, AGENTE, SENIOR AGENTE, SUB INSPECTOR no INSPECTOR kona-ba Diviza rua seluk mak SUPERINTENDENTE no COMISSARIO só aplika ka ba Lideransa ne’ebé mak Lidera PNTL, hanesan iha tempu ne’ebá Paulo de Fatima Martins, nomeadu ba Diretór Nasionál ne’ebé ikus mai hanaran fali Komandante Jerál  PNTL ho Diviza Superintendente ne’ebé ramata nia mandatu iha tinan 2006.

Depois mandatu Paulo de Fatima Martins nian, Governu Timor-Leste liuhosi Ministru Interiór, Alcino Barris de Araujo, nomea Inspektór Afonso de Jesus, hodi kontinua lidera PNTL nu’udar Komandante Jerál PNTL interinu to’o loron 27 marsu 2009 hodi hetan nomeasaun foun no Polítiku ba kargu Segundu Komandante Jerál PNTL nu’udar Komisáriu Polísia.

Hosi loron 27 marsu 2009, IV Governu Konstitusionál Dekreta hodi rezolve ho dalan nomea Longuinhos Monteiro, eis Prokuradór Jerál Repúblika (PGR) hodi lidera no dezenvolve Instituisaun PNTL hamutuk ho Sekretáriu Estadu Seguransa tempu ne’ebá, Francisco da Costa Guterres. Nune’e, kontinua ho Lei Orgánika PNTL ne’ebé mak hasai hosi Governu RDTL iha loron 05 maiu 2004 ho estrutura mak hanesan no laiha mudansa ba diviza to’o tinan 2009.

Iha 18 fevereiru 2009, Governu hasai hikas Lei Orgánika PNTL nian ida-ne’ebé uza to’o ohin loron hodi hamosu estrutura ne’ebé define Adjuntu Komandante Jerál PNTL ne’e hosi na’in-rua ba na’in-ida de’it.

Hanesan mós re-agrupamentu ba BOP/UIR ne’ebé kompañia ketak-ketak inklui CSP no URP (COE) ba fali Unidade foun ida ho naran Unidade Especial da Policia (UEP) hodi tau hamutuk BOP, CSP no COE, aleinde hamosu Estrutura Diviza ka Galhões PNTL nian hosi Nivel Estrutura lima ba nivel ka Estrutura Sanulu Resin 12 mak hanesan Ajente, Ajente Seniór, Ajente Xefe, Sarjentu, Primeiru  Sarjentu, Sarjentu Xefe, Inspektór Asistente, Inspektór, Superintendente Asistente, Superintendente, Superintendente Xefe no Komisáriu.

Iha loron 31 dezembru 2012, Misaun UNPol ramata iha Timor-Leste, ho nune’e Polísia Nasional Timor-Leste mak asume responsabilidade tomak ba seguransa interna nian, hodi serbí no proteje ba komunidade no ba nasaun Timor-Leste.

Enkuantu iha loron 10 fulan-agostu 2022 ne’e, Governu liuhosi reuniaun Konsellu Ministru (KM), aprova ona projeiu dekretu-lei rua ne’ebé aprezenta hosi Primeiru-Ministru (PM) no Ministru Interiór (MI), Taur Matan Ruak no hosi Vise Ministru MI, António Armindo, kona-ba estatutu profisional ba pesoál no funsaun polisiál sira.

Diploma ne’e ho objetivu atu fó ba PNTL estatutu profisionál ba pesoál rasik, hasa’e kondisaun ba servisu pesoál inklui hasa’e kuadru motivasionál.

Aleinde estatutu ne’e hodi reforsa ninia kapasidade hasoru responsabilidade ne’ebé aumenta ba beibeik, ezijénsia no nesesidade efikásia atu fó servisu públiku ba seguransa, liga ba nivél nesesidade sosiedade timoroan, ne’ebé sai informada, kompleta, ezijente liután, no iha sorin seluk hodi adapta ba realidade sosiál foun no ba dezáfiu país ne’e no mundu atuál.

Dekretu lei daruak ne’e ho objetivu atu halo alterasaun ba rejime remuneratóriu PNTL nian.

Entertantu, daudaun ne’e membru PNTL efetivu iha territóriu nasionál hamutuk 4000-resin.

Jornalista   : Nelson de Sousa

Editór         : Cancio Ximenes

iklan
iklan

Leave a Reply

iklan
error: Content is protected !!