HEADLINE, MUNISÍPIU, VIQUEQUE

Notariadu Viqueque la atende asina sertidaun moris semana rua ona

Notariadu Viqueque la atende asina sertidaun moris semana rua ona

Diretór Rejistu Sivil munisípiu Viqueque, Aniceto Moreira. Imajen Tatoli/Vitorino Lopes da Costa

VIQUEQUE, 12 agostu 2022 (TATOLI)—Rejistu Sivil Munisípiu Viqueque liuhosi Diresaun Notariadu, kuaze semana rua ona mak la asina sertidaun moris.

“Ami halo atendimentu dokumentu sertidaun nasimentu, maibé agora kuaze semana rua ona mak la asina komunidade nia sertidaun tanba responsável atu asina ne’e notariadu, maibé agora responsável notariadu iha ne’e muda ba fali iha Lautém no foun seidauk iha. Tanba ne’e komunidade nia dokumentu sei rai iha ne’e,” Diretór Rejistu Sivil Munisípiu Viqueque, Anaceto Moreira, hateten ba Agência Tatoli, iha ninia knaar fatin, Beloi, sesta ne’e.

Maski semana rua ona Ia asina sertidaun moris maibé funsionáriu Notariadu fó atendimentu kada loron.

“Kona-ba prodús sertidaun moris sira-ne’e,  ami loron-loron halo atendimentu ba komunidade sira hosi postu lima ne’ebé eziste iha munisípiu Viqueque. Difikuldade ne’ebé ami enfrenta maka daudaun subtituisaun responsável Notariadu seidauk iha. Tanba ne’e presiza responsável parte Notariadu hodi mai asina sertidaun nasimentu hodi aselera dokumentu sira-ne’e entrega ba komunidade,” nia akresenta.

Notísia relevante: Notariadu Bobonaro atende pasaporte 20 kada loron

Bazeia ba despaixu hosi Ministériu Justisa (MJ) ne’ebé haruka mai Servisu Rejistu Sivil iha loron 25 jullu 2022, katak parte Notaridu no Konservadór sira maka iha kompétensia hodi asina.

“Loloos ne’e Januário Pereira maka mai asina. Ha’u rona nia rejeita mai Viqueque, nune’e ha’u hato’o ona ba Ministru no Xefe Gabinete sira maibé to’o agora seidauk mai. Ha’u hakarak responsável Notariadu mai hodi asina dokumentu sertidaun nasimentu hodi fasilita komunidade,” nia tenik.

Maioria komunidade ne’ebé mai hosi área rurál maka mai trata sertidaun moris maibé responsável Notariadu laiha.

“Ita haree komunidade barak hosi área rurál mak trata sira-nia dokumentu, maibé responsável asina dokumentu sira ne’e laiha. Parte ida ita maka impede komunidade maski funsionáriu sira halo hotu ona, maibé sé maka atu asina,” nia dehan.

Antes ne’e, hosi janeiru to’o jullu Notariadu konsege trata komunidade nia dokumentu hanesan sertidaun moris, sertidaun kaben no sertidaun mate totál hamutuk 875 no halo renovasaun dokumentu hamutuk 11.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!