OMS finaliza instala ekipamentu zinástika iha Covalima
COVALIMA, 12 agostu 2022 (TATOLI)–Organizasaun Mundiál Saúde (OMS) parseiru hosi Ministériu Saúde (MS) finaliza ona instala ekipamentu zinástika ba funsionáriu sira iha resintu Administrasaun Munisípiu Covalima.
“Ekipamentu zinástika ne’e ita bele uza loro-loron maibé ekipamentu ida-ne’e ba funsionáriu hotu mai halo ezérsisiu zinástika iha-ne’e,” Diretór PDIM munisípiu Covalima, Afonso Nugueira Nahak, informa ba Agência Tatoli, iha nia kna’ar fatin Sukaer Laran, sesta ne’e.
Organizasaun Internasionál Saúde Mundiál instala ekipamentu zinástika refere, hanesan ba funsionáriu sira, instala iha resintu Administrasaun Munisípiu Covalima ne’ebé finaliza ona, maibé instalasaun ekipamentu zinástika ba públiku sira sei instala iha resintu Sentru Juventude Covalima (CJC) ne’ebé finaliza ona kee rai-kuak hein atu halo instalasaun ekipamentu.
“Atu kuidadu ekipamentu ne’e, ita hotu tenke asegura tanba ida-ne’e ba ita. OMS halo instalasaun de’it tanba ho hanoin ida hanesan funsionáriu presiza mós ezersísiu kondisaun fiziku di’ak hodi hala’o servisu loro-loron,” nia dehan.
Tuir pedidu sei instala mós iha postu administrativu sira husu katak hakarak instala, maibé sei haree took utilizasaun oinsá funsionáriu ho komunidade kontente utiliza ekipamentu desportu ne’e ka lae.
Se kotente sei hato’o pedidu ba diretór jerál dezenvolvimentu rurál iha Ministériu Administrasaun Estatál (MAE) hodi halo koordenasaun ho parte OMS ho Ministériu Saúde (MS) bele instala iha postu administrativu neen (6) tanba administradór sira mós presiza halo ezersísiu.
“Ekipamentu ezérsisiu ne’e instala hosi Kompañia Internasionál Ozopary hosi Filipina ho nia orsamentu hira ha’u lahatene tanba ita identifika de’it fatin sira mak halo instalasaun ekipamentu zinastika ne’e,” nia dehan.
Jornalista : Celestina Teles
Editór : Cancio Ximenes
