BOBONARO, EKONOMIA, HEADLINE, MUNISÍPIU

PM Taur kolleta ikan Nila-Tilapia tonelada ualu iha Leohitu

PM Taur kolleta ikan Nila-Tilapia tonelada ualu iha Leohitu

Primeiru-Ministru, Taur Matan Ruak, akompaña hosi Ministru Agrikultura no Peskas, Pedro dos Reis no Embaixadór Nova Zelándia iha Timor-Leste, Philip Hewitt, kaer hela ikan hafoin kolleta iha suku Leohitu, Postu Administrativu Balibo, Munisípiu Bobonaro. Imajen Tatoli/Sérgio da Cruz.

BOBONARO, 12 agostu 2022 (TATOLI)-Primeiru Ministru (PM), Taur Matan Ruak, sesta ne’e kolleta ikan Nila-Tilapia tonelada ualu iha sentru viveiru ikan, ne’ebé lokaliza iha suku Leohitu, postu administrativu Balibo, munisípiu Bobonaro.

Atividadae ne’e hanesan lansa simbolikamente maibé sei kolleta mós iha munisípiu rua seluk hanesan iha suku Parlamentu iha Lospalos, Gleno iha Ermera no munisípiu Baucau ho totál ikan tonelada 60, ne’ebé grupu produtór sira hakiak dezde 2020.

Programa ne’e nu’udar sinál hahú époka kolleta ikan nian no sai hanesan selebrasaun ba esforsu tomak ne’ebé agrikultór sira no nasaun ida-ne’e halo hodi habelar prátika peska di’ak hodi haforsa seguransa ai-han, nutrisaun no rendimentu uma-kain nian iha área rurál.

Programa ne’e liuhosi Projetu Dezenvolvimentu akuakultura iha Timor-leste faze 2 (PDATL2), finansia hosi Ministériu Negósiu Estranjeiru no Kooperasaun no Komérsiu Governu Nova-Zelándia nia no ajénsia Dezenvolvimentu Internasionál hosi Estadu Unida Amérika (USAID, sigla inglés). Projetu ne’e implementa hosi WorldFish parséria ho Ministériu Agrikultura no Peska (MAP).

Primeiru Ministru, Taur Matan Ruak, lori governu no povu munisípiu Bobonaro nia naran agredese ba governu Nova Zelándia no Amérika liuhosi parseiru dezenvolvimentu sira- ne’ebé durante ne’e esforsu apoia ona Timor-leste atu dezenvolve setór arkikultura hodi motiva komunidade sira hakiak ikan.

Xefe Governu hateten, daudaun ne’e Timor-leste enfrenta hela problema rua mak hanesan, má-nutrisaun kuaze 47% no kuaze metade populasaun moris kiak, tanba menus rendimentu.

Xefe Governu husu ba agrikultór sira iha Leohitu atu kontinua serbisu hamutuk ho parseiru sira atubele aumenta kuantidade produsaun ikan.

Taur subliña, parseiru dezenvolvimentu investe sira-nia matenek no osan iha Timor, maibé sei labele halo milagre bainhira komunidade sira hanesan na’in ba rai laiha vontade atu dezenvolve liután produsaun atubele ajuda governu kombate problema má-nutrisaun no kiak ne’ebé estadu hasoru durante tinan barak ona.

“Ita-nia parseiru dezenvolvimentu sira halo konstribuisaun ida-ne’ebé ke boot, maske ne’e la’ós sira-nia responsablidade, loloos sira dehan halo imi-nian ba, tanba ami mós iha nasaun no povu,” Xefe Governu hateten.

Eis Prezidente Repúblika ne’e sente kontente haree sentru viveiru ikan ne’e, tanba tinan hirak ba kotuk konsege halao vizita ba suku Leohitu, buka ikan atu haan, maibé  natar laran du’ut mak nakonu.

“Ha’u haree buat ida ba ha’u foun, ne’e mak akuakultura, ne’e altalamente profisionál, teknikamente ne’e di’ak, iha viveiru, ha’u foin mak haree primeira vez. Ne’e ita-boot sira iha avansu ida- ne’ebé ke boot, no ha’u kontente liu rona dehan ita-boot sira mós investe osan, ne’e di’ak, hatudu katak imi iha interese, imi hakarak entaun ne’e fo korjaen ba parseiru sira atu ajuda imi nafatin,” Xefe governu enkoraja grupu akuakultura sira.

Enkarregadu Negósiu Estranjeiru hosi Estadu Unida Amérika, Tom Daley, heteten USAID  hakarak apoia hodi implementa projetu ne’e atu ajuda governu Timor-leste kombate má-nutrisaun no kiak.

“Ha’u kontente tebes haree atinjimentu arkikultór sira atinje iha fatin ida- ne’e, ita haree katak kiak no má-nutrisaun kontinua sai hanesan problema boot no impedimentu ba rekuperasaun no kresimentu, tanba ne’e sei kontinua fó apoia ba setór arkikultura ba diversifikasaun ekonomia no kontribui ba seguransa ai-han no nutrisaun iha Timor-Leste.

Iha fatin hanesan, Sekretáriu Autoridade Munisípiu Bobonaro, João Fátima do Carmo, konsidera projetu refere bele ajuda ona komunidade sira hakbiit ekonomia família inklui hadi’ak nutrisaun komunidade nian.

“Hau hanesan autóridade munisipál agardese ba Governu Nova Zelándia atraves apoiu liuhosi fundu no kbiit ba formasaun no kapasita ona ami-nia povu arkikultór sira,” nia akresenta.

Arkikultór hosi suku Balibo,Casemiro Soares, agradese ba parseiru sira-ne’ebé durante ne’e apoia ona, tanba iha tempu liu ba hakiak ikan durante tinan 15 nunka kolleta, maibé ho projetu ne’e tinan tolu de’it bele kolleta ona.

“Ha’u-nia ikan loron ida tama merkadu dala-rua, dadeer ba fó ema matabisu kilograma 20, depois lokraik hatama tán kilograma 20, entaun loron ida ha’u bele hetan $200,” nia agradese.

Serimónia ne’e partisipa hosi Ministru Agrikultura no Peska Pedro dos Reis, Ministru Edukasaun, Juventude no Desportu Armindo Maia, entidade relevante sira seluk no komunidade Leohitu.

Jornalista: Sérgio da Cruz

Editór: Evaristo Soares Martins

iklan
iklan

2 Comments

  1. Governo hein ba koleita deit. Povu Nia produtu, Nusa maka Governo la kria hanesan povu kria nee iha Municipo Ida Idak, atu nunee bele fo servisu ba joven Sira?

  2. Governo hein ba kolkeita povu Nia Produtu, Nusa mka Governo la kria kondisaun hanesan nee iha Municipo Sira atu nunee bele kria servisu ba joven Sira, hakiak ikan, manu, karau fahi ho bibi. Atu nunee Ita la depende deit inportasaun husi estranjeiru Mai. Tamba sa maka povu bele kria kondisaun Ida nee, maibe Governo la bele?

Leave a Reply

iklan
error: Content is protected !!