iklan

EKONOMIA, HEADLINE, MUNISÍPIU, OÉ-CUSSE (RAEOA)

RAEOA prepara grupu feto aprezenta produtu tais iha festivál Kefamenanu

RAEOA prepara grupu feto aprezenta produtu tais iha festivál Kefamenanu

Produtu OÉ-CUSSE, 12 agostu 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), lideradu Arsénio Paixão Bano, sesta ne’e konvida grupu agrikultura tolu hosi suku Suni-Ufe, Taiboko no Naimentu hodi prepara produtu orijinál sira atu promove iha selebrasaun festivál tinan 100 sidade Kefa, kabupaten Timur Tenggah Utara (TTU), Repúblika Indonézia.

“Ita konvida grupu sira no grupu seluk tán, ita sei lori sira ba Indonézia fa’an no promove produtu orijinál Oé-Cusse nian, tanba konvite ita simu ona kona-bá festivál tinan 100 iha sidade Kefa, tn ne’e ita prepara, konvida ita-nia grupu sira mai, preparasaun ne’e oinsá, tanba antes ne’e autoridade konvida sira,” Arsénio Bano ko’alia iha Oé-Cusse, sesta ne’e.

Alende halo promosaun, sei halo mós estudu komparativu ba grupu agrikultura sira iha kabupaten TTU nomoos Belu, Atambua, kona-bá tékniku produsaun produtu lokál asesu ba merkadu.

“Ohin, ami deskuti ho sira atu prepara produtu sira, nomoos sei estudu komparativu iha TTU no Belu, ita labele ba dook, tanba iha-ne’ebá produtu hanesan ho Oé-Cusse, ita ba atu haree halo di’akliu ne’e oinsá, nune’e ita bele implementa iha ita-nia rejiaun, nomoos estratéjia ba merkadu ne’e oinsá, tanba iha futuru ita sei harii sentru pusat kerajinan, nune’e bele akumula grupu agrikultura sira hotu iha fatin ida,” nia afirma.

Tuir nia haree, atividade hanesan estratéjia atu estímula hanesan dudu agrikultór sira, tanba tuir planu autoridade, iha tinan oin sei kontrata formadór hosi rai-li’ur, atu fasilita formasaun ba grupu agrikultura sira, oinsá hasa’e kualidade no kuantidade produtu, kona-bá tais no ortikultura.

“Grupu hirak-ne’e durante ne’e hetan apoiu hosi autoridade, no ONG sira, polítika ne’e apoiu grupu sira hodi dezenvolve produtu saida de’it liuhosi sira-nia profisionál no inisiátiva, nune’e bele hetan osan sustenta família,” nia katak.

Xefe grupu Moris Foun, Marta Lafu, hosi suku Naimeko, orgullu, tanba autoridade RAEOA buka dalan atu partisipa hodi promove no fa’an sira-nia produtu iha selebrasaun festivál ne’e, nune’e nia promete sei prepara ho másimu tanba reprezenta Oé-Cusse.

“Ohin, ami hasoru autoridade atu prepara kona-bá beti-tais no selenda, tanba ne’e ami-nia atividade loron-loron iha ami-nia grupu, ami-nia grupu kontente tán ami sei prepara di’ak, ba produtu sira hanesan, beti-tais no selendan, pateka, luhu, kakehe, lafatik no seluk tán” nia orgullu.

Grupu tolu ne’e mak hanesan, grupu  Moris Foun hodi suku Naimeko, sub-rejiaun Pante Makasar, ho atividade prinsipál maka prodús beti-tais no selendan ho kór oinoin, grupu Nusat Nasolo hosi suku Suni-Ufe, sub-rejiaun Nítibe, ho atividade prinsipál maka pateka, tomate no seluk tán.

Nune’e mós grupu Tasi-Ufe, hosi suku Taiboko, sub-rejiaun Pante Makasar, ho atividade prinsipál prodús beti-tais no selendan.

“Ami-nia grupu eziste iha Oé-Cusse, dezde 2016, ami agradese ba autoridade tanba iha tinan kotuk fasilita ami, liuhosi apoiu no akompañamentu, nune’e ami bele hasa’e tanba ami-nia atividade atu buka osan hodi sustenta uma laran,” nia agradese.

Entretantu, iha 28 dezembru 2021 autoridade RAEOA hamutuk ho Asosiasaun Feto Mudansa Ekonómia Família selebra termu entrega apoia fundu ho valór rihun $94, hosi ba grupu feto 34 atu dezenvolve insiativa feto sira-nia kreatividade ho durasaun tinan ida.

Fonte finansiamentu ba programa empoderamentu ekonomia família ne’e. autoridade RAEOA aloka hosi kategoria transferénsia públika.

Notísia relevante: RAEOA apoia rihun $94 ba Feto Mudansa Ekonomia Família

Jornalista: Abílio Elo Nini
Editór: Evaristo Soares Martins

iklan
iklan

Leave a Reply

iklan
error: Content is protected !!