DILI, EDUKASAUN, HEADLINE, NASIONÁL, POLÍTIKA

Kandidatu na’in-haat la tuir teste bolsa estudu ba POLTEKBANG Surabaya

Kandidatu na’in-haat la tuir teste bolsa estudu ba POLTEKBANG Surabaya

Ekipa konjunta hosi ANATL, FDCH no Politeknik Penerbangan Surabaya fó teste eskrita ba joven sira hodi kompete ba bolsu estudu ba Politeknik Penerbangan Surabaya, iha salaun Kebudaayaan Indonézia, sábadu (13/08). Imajen Tatoli/Francisco Sony.

DILI, 13 agostu 2022 (TATOLI)–Prezidente Konsellu Administrasaun Aeroportu no Navegasaun Aérea Timor-Leste (ANATL), José Trindade da Cruz Pinto, hateten entre kandidatu na’in 32 ne’ebé sira-nia naran selesionadu atu mai tuir teste iha loron 13 agostu ne’e iha na’in-haat mak la mai tuir teste entaun agora hela de’it na’in-29.

Prezidente Konsellu Admistrasaun ANATL,E.P, José Trindade da Cruz Pinto. Imajen Tatoli/Francisco Sony.

“Ami halo ona verifikasaun ba lista kandidatu na’in-32 nian konsege identifika iha kandidatu na’in-haat mak la mai tuir teste. Purtantu agora sira-ne’ebé iha sala laran ne’e hamutuk 29 kandidatu de’it,” nia dehan ba Agência Tatoli iha Gedung Kebudayaan Indonézia Mascarinhas, sábadu ne’e.

Prezidente ANATL ne’e informa, antes ne’e sira halo ona kontaktu hodi fó hanoin ba sira kona-ba preparasaun atu mai partisipa iha teste eskrita ne’e, no ANATL mós halo tan audiénsía no kontaktu ho kandidatu ida-idak maibé sira na’in-haat la marka prezensa.

“Ita hein sira na’in-haat ninia prezensa maibé nunka mosu de’it. Ita halo kontaktu duni ho kandidatu na’in-haat ne’e sira dehan mai ona, maibé to’o agora nunka mosu hela de’it to’o teste hahú ona no ekipa juri sira dehan teste hahú sei la simu tan ona,” nia dehan.

Hosi prosesu teste ba loron dahuluk ne’ebé realiza iha sábadu (13 agostu) ne’e ba kandidatu na’in-29 ne’e, sei tuir teste faze rua mak iha tempu dadeer teste eskrita no depois hosi meudia ba to’o lokraik maka teste orál ka entrevista.

Hosi faze dahuluk ne’e ninia rezultadu sei anunsia kedan atu nune’e kandidatu na’in-29 ne’ebé bele hatene sé mak pasa iha faze dahuluk mak sei kontinua ba faze tuir mai no iha segunda semana oin mak tuir teste médiku.

Nune’e mós, nia dehan, hosi rezultadu teste médiku ne’e sei anunsia kedan sé mak liu sei hakat ba teste fíziku iha tersa-feira no kandidatu ne’ebé pasa iha teste fíziku mak sei hakat ba teste dahaat iha kuarta-feira ne’e sei selesiona ema na’in-neen.

Teste Saúde no teste fíziku ne’e importante tanba atu garante kandidatu na’in-neen ne’ebé selesionadu ka pasa hosi prosesu sira-ne’e tenke iha duni kondisaun saúde no fíziku ida di’ak, atu bainhira sira ba halo estudu durante tinan tolu iha POLTEKBANG Surabaya ne’e labele hetan moras.

“Ita hakarak sira tenke foku tanba oportunidade ne’ebé Estadu no Governu fó ba kandidatu na’in-neen faze daruak ne’e, atu prepara duni rekursu umanu ida kualifikadu no bainhira sira finaliza estudu iha POLTEKBANG Surabaya sira iha ona fatin atu servisu iha ita-nia Aeroportu,” nia dehan.

Kandidadtu selesionadu na’in-neen ne’e nu’udar benefisiáriu hodi hetan bolsa estudu hosi Fundus Dezenvolvimentu Kapitál Umanu (FDCH) no molok atu dezloka ba hala’o estudu iha Indonézia Surabaya, ANATL sei kesi sira ho ho kontratu nune’e bainhira fila-fali mai la presiza atu buka tan servisu, tanba sira-nia fatin prepara ona tuir área ne’ebé sira estuda ba.

Area ne’ebé kandidatu sira sei estuda durante tinan tolu ne’e mak iha area operasionál, Avsec (Aviation security) no Bombeiru (Fire Figting).

Nia dehan, durante tinan tolu estudante sira sei hetan teoria no pratika. sira eskola iha POLTEKBANG Surabaya maibé sira sei la’o hadulas mós Aeroportu sira iha Indonézia hodi hala’o pratika atu nune’e sira fila-fali mai bele kontribui ba servisu iha aeroportu.

“Ha’u hakarak dehan sira na’in-neen atu kontinua estuda ne’e tama ona ba faze daruak. Tanba ita iha ona kandidatu na’in-neen faze dahuluk nian mak setembru dia 19 sei simu ona graduasaun. Oras ne’e sira na’in-neen hala’o hela pratika iha aeroportu Indonézia mak hanesan Mataram, Sulawesi, Jawa inklui Kupaun atu nune’e sira bele manan esperiénsia hodi fila-fali mai bele jere mós jestaun iha Aeroportu,” nia dehan.

Entretantu sub Koordenadór Taruna no Alumni POLTEKBANG Surabaya, Hery Fitrianto hateten sira sente orgullu tanba hetan ona oportunidade hosi primeiru no segundu tanba Governu Timor-Leste liuhosi ANATL bele fó nafatin fiar ba sira hodi simu estudante kualidade timoroan na’in-12 ba kontinua tan estuda iha POLTEKBANG Surabaya.

“Ami simu ho haksolok programa ida-ne’e tanba ami konsidera programa ne’e di’ak tebe-tebes. No, ami prontu atu ezekuta no prontu atu eduka ami nia lain sira hosi TL iha matéria aviation security atu sira bele fila-fali mai TL hodi kontribui ba ANATL,” nia dehan.

Jornalista : Tomé Amado 

Editór        : Cancio Ximenes

iklan
iklan

Leave a Reply

iklan
error: Content is protected !!