COVALIMA, KAPITÁL

Autoridade Covalima sei konstrui lixeira iha merkadu antigu no Camanasa

Autoridade Covalima sei konstrui lixeira iha merkadu antigu no Camanasa

Diretòr Servisu Munisipál Jestaun no Merkadu Covalima, Vitorino do Carmo. Imajen Tatoli/Celestina Teles.

COVALIMA, 15 agostu 2022 (TATOLI)–Autoridade Munisípiu Covalima (AMC) liuhosi Servisu Munisipál Jestaun Merkadu no Turizmu sei konstrui lixeira iha merkadu antigu no merkadu foun iha suku Camanasa.

“Hafoin ha’u asume kargu ida-ne’e, ha’u halo ona monitorizasaun ba lixu no espasu iha merkadu laran.  Ha’u haree no tau ona iha planu, atu konstrui lixeira iha merkadu hanesan iha merkadu antigu no merkadu foun iha suku Camanasa,” Diretór Servisu Munisipál Jestaun Merkadu no Turizmu,  Vitorino do Carmo, hateten ba jornalista sira iha nia kna’ar fatin, Sukaer Laran, segunda ne’e.

Razaun atu konstrui lixu fatin ne’e, tanba bainhira negosiánte sira-halo negósiu iha loron bazar nian iha merkadu karik, sira tenke so’e lixu iha lixeira ne’ebé mak konstrui ona, nune’e lixu labele butuk no lekar iha markadu laran.

Aleinde jestaun merkadu haree kona-ba lixu iha merkadu, haree mós kona-ba espasu negosiánte sira-ne’ebé iha loron merkadu halo negósiu iha estrada ninin sira-ne’e.

“Ami haree ona ba negosiánte ne’ebé faan iha estrada ninin sira sei faan iha uma sira-ne’ebé mak mamuk, tanba ema agora la faan uma ne’ebé mak prepara maibé sira hadau malu hodi faan iha estrada ninin,” nia esplika.

Ho nune’e, negosiánte sira faan sasán fila oin ba malu nune’e kompradór-sira bele haree sira-nia produtu ne’ebé mak sira faan, nune’e bele sosa sira-nia produtu. Tanba ko’alia kona-ba jestaun lixu, jestaun merkadu la’ós ema ida-nia servisu de’it maibé tenke servisu ho koletivu.

Jornalista : Celestina Teles

Editór       : Cancio Ximenes

iklan
iklan

Leave a Reply

iklan
error: Content is protected !!