Dadus provizóriu kandidatu veteranu válidu iha Covalima hamutuk 9,931
COVALIMA, 15 agostu 2022 (TATOLI)–Prezidente Konsellu Kombatente Libertasaun Nasionál munisípiu Covalima, Osório Soares “Mausoko” informa, komisaun verifikasaun dadus kandidatu veteranu ensera ona no rezultadu verifikasaun hatudu dadus ptovizóriu kandidatu veteranu validu iha Covalima hamutuk na’in-9,931.
“Komisaun verifikasaun dadus kandidatu veteranu iha munisípiu Covalima ensera ona, nune’e ita rejista dadus provizóriu kandidatu veteranu validu hamutuk na’in-9,931 no hosi númeru ne’e mane 5,707 no feto 4,224,” Osório Soares “Mausoko” relata dadus ne’e ba Agência tatoli, iha nia kna’ar fatin, Tabakolot, segunda ne’e.
Tuir dadus, Konsellu Munisipál Kombatente Libertasaun Nasionál munisípiu Covalima dadus kandidatu veteranu validu na’in-9,931, pendente 958, mate 2,743, moris 7,188 ne’ebé mai hosi postu administrativu hitu (7) hanesan postu administrativu Fatumea validu 322, pendente 115, mate 143, moris 385.
Iha postu administrativu Fatululik ne’e, dadus kandidatu veteranu na’in-479, pendente 39, mate 108 no moris 371. Postu Fohorem dadus validu 1,440, pendente 143, mate 353 no moris 1,087. Iha postu Tilomar válidu 790, pendente 63, mate 228 no moris 562.
Iha postu administrative Zumalai ne’e dadus kandidatu veteranu validu 2,326, pendente 246, mate 805 no moris 1.521. Postu administrativu Maucatar kandidatu veteranu validu 1.844, pendente 202, mate 617 no moris 1.227 no postu Suai kandidatu veteranu válidu 2.524, pendente 179, mate 489 no moris 2.035.
“Hafoin halo verifikasaun, dadus ne’e ami sei hein orientasaun hosi nasionál no bainhira atu halo avaliasaun iha nasionál ka iha munisípiu hodi bele hatene loloos pasa ka lae. Maibé ami seidauk simu orientasaun,” nia dehan.
Jornalista : Celestina Teles
Editór : Cancio Ximenes
