BAUCAU, HEADLINE, MUNISÍPIU, SOSIEDADE SIVĺL

Diákonu Fortunato Flores simu ordenasaun presbiterál

Diákonu Fortunato Flores simu ordenasaun presbiterál

Diakonu Fortunato Hendrique Soares Flores, ne'ebé segunda ne'e simu ordenasaun presbiterál nu'udar Amu-lulik hosi Arsebispu metropolitanu atual Bispu Dioseze Dili, Monsiñor Dom Virgílio do Carmo da Silva, SDB. Imajen Tatoli/Natalino Belo.

BAUCAU, 15 agostu 2022 (TATOLI) – Diákinu Fortunato Hendrique Soares Flores, segunda ne’e simu ordenasaun presbiterál nu’udar amu-lulik hosi Arsebispu Metropolitana atúal Bispu Dioseze Dili, Monsiñor Dom Virgílio do Carmo da Silva, SDB iha Igreja Katedrál Dioseze Baucau.

Monsiñor Dom Virgílio do Carmo da Silva, SDB hateten, Maromak fihir nanis nia-ema molok mundu hahú nune’e finalidade ba eskolla ne’e atu sai santu no karidade bibi-atan nian, sai ponte unidade moris ne’ebé hetan uluk liuhosi sakrifísiu eukarístiku.

“Uma kreda liuhosi konsellu vatikanu daruak hakarak fó hanoin nafatin ba Amu-lulik hotu, liuliu ba diákonu Fortunato katak kna’ar pastorál tomak fiar de’it mak superiór fó, tenke hetan forsa hosi eukarístia,” Bispu Dioseze Dili hateten iha Igreja Katedrál Baucau, Vila Antiga.

Dom Virgílio do Carmo da Silva, SDB husu atu sarani hotu reza ba Diákonu Fortunato Flores, SDB ne’ebé simu ona sarkramentu saserdotál atu Maromak hakonu ho grasa oinoin, liuliu grasa saserdósiu atu tau iha neon kona-ba ordenasaun, ne’ebé simu hodi transforma iha moris nune’e lori rahun di’ak ba Maromak-nia reinu.

Dom Virgílio hateten liuhosi festa solene Assunção Virgem Santísma nian sai momentu importante ba Amu-lulik hotu-hotu atu iha laran no badinas hodi hala’o kna’ar bibi-atan ne’ebé di’akliu tanba sarani sira.

“Ordenasaun saserdotál sai Padre tanba atu  selebra eukarístia nune’e tenke prontu iha kualkér situasaun no oferese tempu tomak bainhira sarani sira presiza,” Dom Virgílio akresenta.

Padre Fortunato Hendrique Soares Flores, SDB hato’o agradesementu ba entidade hotu hanesan Igreja katólika Timor-Leste, padre no madre sira hotu inklui Salesioanu Dom Bosco, liuliu Monsiñor Dom Virgilio do Carmos da Silva, SDB ne’ebé ho laran luak ordena ona Nia nu’udar amu-lulik.

Alende ne’e, Padre Fortunato Flores, SDB, agradese ba autoridade lokál no suku, responsável Dioseze Baucau no sarani hotu no ba nia inan-aman ne’ebé eduka ne’ebé ikus sai Amu-lulik hodi serbí iha uma-kreda Katólika.

“Keta haluha reza mai ha’u, liuhosi Maromak nia grasa no Na’in feto nia harohan no maluk sira hotu nia tulun atu ha’u bele fiél nafatin ba vokasaun Nain-lulik salesianu to’o rohan,” Padre Fortunato Flores hateten.

Diákonu Fortunato Hendrique Soares Flores, moris iha Suku Caibada, postu administrativu Baucau Vila, munisípiu Baucau, iha loron 26 fevereiru tinan 1991 , nu’udar oan dahuluk hosi João da Costa Flores no Regina Soares hosi maun-alin na’in-neen kompostu mane na’in-haat no feto na’in-rua.

Hahú estudu iha Ensinu Báziku Caibada hosi tinan-1997 to’o remata iha tinan-2002, kontinua estudu iha pre-aspirando iha eskola Beato Filipe Reinaldi, postu Venilale hosi tinan-2002 too 2005 no finaliza ensinu Sekundária iha Fatumaca no kontinua iha resintu Salezianu Dom Bosco Fatumaca to’o tinan-2010 tama pre-novisiano iha Lospalos.

Iha loron-6 fulan-jullu tinan-1991, Diákonu Fortunato Hendrique Soares Flores, simu sakramentu baptismu hosi Padre Rolando Fernandes, SDB, sakramentu kumiñaun iha tinan-2022 no sakramentu krisma iha loron-23 fulan-maiou tinan-2005 iha Parókia Santu António Baucau, Vila Antiga.

Hahú halao vida nu’udar seminarista iha munisípiu Laútem, iha tinan-2011 halao novisiado iha Fatumaca Baucau no kontinua estudu Filozofia iha Institutu Filozófiku São Francisco de Sales, Dili, hosi tinan-2012 to’o 2014.

Hosi tinan-2015 to’o 2018 hala’o estájiu nu’udar asistente pre-aspirando iha Saleziano Dom Bosco Venilale nune’e kontinua estudu Teolojia hosi tinan-2019 to’o 2021 iha Universidade Pontificia Saleziano, Roma, Itália.

Diákonu Fortunato Flores ne’ebé hili motto “Ne’e sa nai, Atan Oan mak-ne’e halo tuir deit Ita liafuan-ba” (São Lucas 1:38) iha ordenasaun presbiterál hala’o votu perfetua iha loron-25 fulan-maiu tinan-2020 iha Kapela São Domingos Savio, Roma, Itália.

Diákonu Fortunato Flores simu ordenasaun diakonu hosi Kardeál Angelo Amato nu’udar perfetu Eméreto kongregasaun Kauza Santo sira loron-19 fulan-jullu tinan-2021 hamutuk ho diákonu na’in-hitu seluk iha Bazilika, Santu Giovanni Bosco, Roma, Itália.

Diákonu Fortunato Flores kontinua hala’o tinan pastorál iha Bazilika Sagrado Coração de Jesús Roma, Itália to’o loron-18 fulan-jullu tinan-ne’e fila mai Timor-Leste hodi hala’o preparasaun ba ordenasaun saserdotál.

Nune’e ohin loron-15 fulan-agostu, Diákonu Fortunato Hendrique Soares Flores, simu ordenasaun presbiterál hosi Arsebispu metropolitanu atúal Bispu Dioseze Dili, Dom Virgílio do Carmo da Silva, SDB nia-liman Santu.

Jornalista    : Natalino Belo

Editór           : Evaristo Soares Martins

iklan
iklan

Leave a Reply

iklan
error: Content is protected !!