EKONOMIA, HEADLINE, MUNISÍPIU, OÉ-CUSSE (RAEOA), SOSIEDADE SIVĺL

Komunidade Usitaku konvida Autoridade RAEOA inaugura estrada foun iha Kuantua

Komunidade Usitaku konvida Autoridade RAEOA inaugura estrada foun iha Kuantua

Komunidade Usitaku konvida Autoridade RAEOA inaugura estrada foun iha aldeia Kuantua. Imajen mídia ZEESM

OÉ-CUSSE, 15 agostu 2022 (TATOLI) – Komunidade sira hosi suku Usitaku, sub-rejiaun Nítibe, konvida Autoridade Rejiaun Administrativa Espesiál Oé-Cusse Ambeno (RAEOA), ne’ebé lideradu Arsénio Paixão Bano, sábadu semana kotuk halo inaugurasaun ba estrada foun kilómetru 1 iha aldeia Kuantua ne’ebé mellora hosi inisiativa.

Iha inagurasaun ne’e, Prezidente Autoridade RAEOA, Arsénio Paixão Bano, agradese ba autoridade komunitáriu ho estrutura sosiál Usitaku tanba insiativa mobiliza komunidade hodi mellora rasik estrada iha knua rasik.

“Ha’u haree inisiativa ne’e di’ak, iha sabadu ha’u ba inaugura tanba komunidade mak konvida, ha’u entuziasmu entaun ita ba atu fó tan korajen no motiva komunidade sira atu haree fali problema seluk hanesan bee-moos, eletrisidade no seluk, nune’e ita bele fó tan apoiu ba sira-nia inisiativa ne’e,” Arsénio Paixão Bano, ko’alia iha Oé-Cusse, segunda ne’e.

Nu’udar Prezidente Autoridade iha RAEOA, agradese tanba dala barak Prezidente ho Sekretáriu Rejionál sira maka tun hodi rezolve iha baze, maibé ida-ne’e xefe suku no estrutura tomak sira serbisu hamutuk hodi rezolve komunidade sira-nia preokupasaun iha baze.

“Ita nafatin enkoraja komunidade Usitaku nia inisiativa ne’e atu kontinua hametin liután, atu dezenvolve mós asuntu sosiál seluk, kona-bá haki’ak animál, no kontinua tau-matan ba bee-matan sira atu labele maran, hodi fó moris ba animál no komunidade,” nia afirma.

Xefe Suku Usitaku, Hilario Babo, agradese ba autoridade RAEOA nia prezensa iha suku, importante atubele fó hanoin nafatin ba komunidade.

Nia agradese mós ba Autoridade RAEOA, tanba iha prosesu melloramentu estrada foun ne’e hetan apoiua hosi programa Food for Work iha 2021, kada uma kain hetan foos saka rua, nomoos hetan apoia liuhosi programa Community Based Maintenance (CBM).

“Objetivu hosi loke estrada ne’e tanba knua orijen iha suku ne’e rasik seidauk asesu estrada, tan ne’e maka ami organiza sira halo hodi bele asesu mai estrada boot, tanba komunidade iha knua orijen Kauntua hamutuk 789, nune’e estrada sei fasilita ema, transporte públiku no privada, nune’e bele hala’o atividade ekonomia lori produtu ba merkadu,” nia orgullu.

Bazea dokumentu cesta bázika 2021 nian, totál populasaun iha suku Usitaku hamutuk 3,042, komposta hosi aldeia Kuantua, Nítibe, Fatunababu, no Oamna

Jornalista: Abílio Elo Nini
Editór: Evaristo Soares Martin

iklan
iklan

Leave a Reply

iklan
error: Content is protected !!