COVALIMA, 15 agostu 2022 (TATOLI)–Sentru Solidariedade Sosiál no Inkluzasaun (SSI) Covalima rejista komunidade ho problema bem-star sosiál provizóriu na’in-3,094 iha munisípiu Covalima.
“Programa Prióridade hosi Ministériu Solidariedade Sosial no Inkluzaun (MSSI), iha tinan ne’e, halo levantamentu dadus kona-ba ema ho problema bem-star sosiál ne’ebé iha munisípiu Covalima rejista na’in-3,094,” Diretór Sentru Solidariedade Sosial, Agapito Asis, informa ba Agência Tatoli, iha nia kna’ar fatin Suai Loro, segunda ne’e.
Objetivu hosi levatamentu dadus ema ho problema bem-star sosial ne’e hanesan baze dadus ba Ministériu hodi identifika ema ho problema bem-star ne’e nia kondisaun oinsá.
“Ho nune’e, ita presiza atualiza bele halo analiza totál ema vulneravél ne’e oinsá ho sira-nia kondisaun hosi levantementu ita bele prepara di’akliu bazea tipu problema no vulneravél ne’ebé iha,” nia hateten.
Tanba ne’e pontu vokál iha postu administrativu sira hahú halo ona levantamentu dadus durante fulan rua liu-ona ne’ebé kobre ona postu administrativu hitu iha munisípiu Covalima, falta de’it suku Suai Loro no Beco hosi postu administrativu Suai no postu Tilomar iha suku Beiseuk ne’ebé sei halo lavantamentu dadus.
Sentru Solidariedade Sosial no inkluzaun hala’o levantamentu dadus refere hodi haree tipu ema ho problema mak hanesan labarik risku ho perigu, adosaun labarik, labarik ne’ebé ho podér paternál, labarik nakar, labarik konflitu ho lei, ema tane liman hodi husu izmola, ema-ne’ebé moris lemo-lemo, konsumidór droga, vítima violénsia ba jéneru, ema ho difisiénsia ho moras króniku.
Eis prizóneiru ne’ebé vulneravél, ferik katuas abandonadu, feto risku sosiál ekonómika, família ki’ak, família ho uma laiha kondisaun atu hela, vítima dezastre naturál, labarik ne’ebé hala’o moris iha dalan, komunidade LGBTI no labarik orfanatu.
