KAPITÁL, NASIONÁL

AMD reativa PMOPA iha postu administrativu lima

AMD reativa PMOPA iha postu administrativu lima

Komunidade Postu Administrativu Don Aleixo, Munisípiu Dili, halo limpeza jerál iha área kampung Alor, Dili, Imajen Tatoli/Arminda Fonseca

DILI, 16 agostu 2022 (TATOLI)—Governu liuhosi Autoridade Munisípiu Dili (AMD), reativa ona Programa Mão de Obra Postu Administrativu (PMOPA) iha postu administrativu Cristo Rei, Nain Feto, Don Aleixo, Vera Crúz no Metinaro, iha fulan-agostu ne’e nia laran hodi halo limpeza.

“Iha fulan agostu tinan ne’e, ita reativa ona PMOPA iha postu lima, hodi nune’e populasaun sira bele hala’o fali limpeza iha aldeia ka suku laran,” Adjuntu Prezidente Autoridade Munisípiu Dili, António Moniz Clau, hateten ba Agência Tatoli, via telefónika, tersa ne’e.

Autoridade Munisípiu Dili reativa PMOPA ne’e ho objetivu atu fó kampu traballu ba komunidade iha aldeia no ho sira-nia prezensa liuhosi programa PMOPA ne’e bele asegura ona limpeza iha kada aldeia sira liga ba saúde, no mós bele halo ona prevensaun ba kombate dengue.

Tanba, nia dehan, atividade ne’e iha tinan 2021 la’o ona, hafoin liuhosi orsamentu retifikativu ne’e mak aprova tan orsamentu ba PMOPA iha tinan 2022. Nune’r, iha prosesu ne’e nia natureza organiza ema la hanesan.

“Iha 2021, ita organiza iha nível suku no agora ita organiza iha nível aldeia sira,” nia dehan.

Maske nune’e, servisu iha Programa Mão de Obra Postu Administrativu (PMOPA) ne’e nia kontratu mensal be’e hahú hosi fulan-agostu to’o 31 dezembru 2023.

“Maibé, tuir matadalan ne’ebé iha, fulan ida ita tenke troka ona ema, atu nune’e ema barak bele asesu ba iha PMOPA ne’e,” nia hateten.

Administradór postu administrativu Cristo Rei, munisípiu Dili, Venancio Tavares, kateten atividade PMOPA ne’e Governu liuhosi Autoridade Munisípiu Dili (AMD) halo ona lansamentu iha fulan agostu nia laran iha suku Ailok, postu administrativu Cristo Rei, munisípiu Dili, hodi hala’o limpeza iha suku Ailok.

Iha atividade PMOPA ne’e, nia hateten, ba postu administrativu Cristo Reisei hala’o iha suku no aldeia sira hotu, nune’e ema hotu-hotu bele envolve halo limpeza, tanba ne’e servisu ba PMOPA ne’e iha ema hamutuk 20.

“Sira-nia servisu ne’e, ami halo troka malu, hanesan iha aldeia ida iha grupu haat (4). Iha grupu haat (4) ne’e ema nain-20. Hosi ema 20 ne’e, sira servisu loron lima kada aldeia, hosi ne’e sira simu kedas osan mak para. Depois grupu daruak tama fali, atu nune’e ema hotu bele hetan oportunidade,” nia dehan.

Hosi ema 20 ne’e, iha membru 19 no ida supervaisor, entaun iha membru 19 ne’e loron ida ema ida hetan $5 no supervizór ne’e hetan $7. Sira-nia kontratu servisu iha fulan haat (4) nia laran, ne’ebé hahú hosi fulan-agostu to’o dezembru tinan ne’e.

Prosesu rekruta ema ba ba atividade limpeza ne’e, xefe aldeia no xefe suku mak rekruta komunidade hodi halo limpeza iha terrenu, hanesan hanesan sira hamoos iha ida-idak nia aldeia no balun bele kuda ai-oan.

Ligasaun ho kuda ai-oan, Autoridade Munisípiu Dili (AMD) servisu hamutuk ho Ministériu Agrikultura no Peska (MAP) hodi apoiu ai-oan ba pesoál iha atividade PMOPA atu kuda.

Entretantu, tuir informasaun hosi Administradór postu administrativu Cristo Rei, munisípiu Dili katak iha atividade ne’e sira-nia parte hetan orientasaun katak membru servisu ne’e ba komunidade no xefe aldeia, delegadu, xefe suku no administradór postu sira labele tama iha prosesu PMOPA hanesan halo limpeza hodi hetan osan.

Jornalista : Nelia Fernandes

Editór      : Cancio Ximenes

iklan
iklan

Leave a Reply

iklan
error: Content is protected !!