KAPITÁL, NASIONÁL

Governu hahú konstrui moru protesaun ba mota ulun Becora

Governu hahú konstrui moru protesaun ba mota ulun Becora

Kompañia Santana Diak Unipesoál, Lda, hodi hahú konstrui moru protesaun ba mota iha aldeia Mota Ulun, suku Becora. Imajen Tatoli/Nelia Fernandes.

DILI, 16 agostu 2022 (TATOLI)—Administradór postu administrativu Cristo Rei, munisípiu Dili, Venancio Tavares, hateten iha tinan ne’e Governu liuhosi Ministériu Obra Públika (MOP) kontrata ona kompañia Santana Diak Unipesoál, Lda, hodi hahú konstrui moru protesaun ba mota iha aldeia Mota Ulun, suku Becora, ne’ebé hetan estragu tanba inundasaun.

“Iha tinan ne’e, ita-nia Governu liuhosi Ministériu Obra Públika kontrata ona kompañia Santana Diak, hodi hahú tau ona moru protesaun ba mota ulun Becora ne’ebé estragu tanba inundasaun,” Venancio Tavares informa ba Agência Tatoli, iha nia kna’ar fatin, Becora, Dili, tersa ne’e.

Kompañia Santana Diak Unipesoál, Lda, hodi hahú konstrui moru protesaun ba mota iha aldeia Mota Ulun, suku Becora. Imajen Tatoli/Nelia Fernandes.

Tuir nia, prosesu halo konstrusaun moru protesaun ba aldeia Mota Ulun ne’e liuhosi konkursu públiku ne’ebé mak empreza Santana Diak Unipesoál. Lda, mak sai vensedór hodi hahú halo konstrusaun refere.

“Servisu ne’ebé kompañia sira halo ne’e liuhosi prosesu konkursu mak to’o agora sira hala’o servisu ne’e. Daudaun ne’e, kompañia sira-nia servisu la’o hela iha terrenu, iha buat ruma ami sempre iha komunikasaun ba malu atu ko’alia,” nia dehan.

Maske nune’e, prosesu konstrui moru protesaun ne’e tanba dalan komunidade hodi la’o ba-mai ne’e hetan estragu hosi inundasaun, tanba ne’e kompañia sira tau moru protesaun atu nune’e udan mai labele estragu tan.

“Prosesu dezenvolvimentu ne’e ita labele ansi, se ita ansi buat hotu halo la loos. Bainhira halo ne’e tuir Planta no Kadernu Enkargu (BoQ) ne’ebé arkitetu sira halo loloos, foin implementa no daudaun ne’e balun implementa ona,” nia esplika.

Responsavel ba konstrusaun moru protesaun Mota Ulun-Becora, Fransiano dos Santos Belo, hateten prosesu konstrusaun moru protesaun ne’e kompañia Santana Diak, tuir konkursu publiku iha Ministériu Obra Públika (MOP), nune’e kompañia ne’e sai vensedór hodi halo konstrusaun ba moru protesaun mota ne’e.

Plaka konstrusaun moru protesaun ba mota ulun Becora. Imajen Tatoli/Nelia Fernandes.

“Entaun, iha prosesu ne’e ami komesa hala’o servisu iha loron 18 fulan-jullu ne’e, komesa ke’e ona no iha loron 25 jullu ami komesa konstrui ona moru protesaun (tembok penahan). Tanba, ami hetan kontratu ba moru protesaun ho nia naruk metru 300, parte liman kuana metru 250 no parte liman karuk metru 50, no nia durasaun tinan ida,” nia dehan.

Maske nune’e, iha prosesu servisu ne’e, kompañia nia parte hasoru difikuldade iha terenu, tanba komunidade hela besik iha prosesu konstrusaun moru ne’e protesta beibeik hodi dehan tauk karik sira-nia rai ne’e sai kle’uk tanba konstrusaun ne’e.

“Difikuldade kona-ba prosesu servisu nian laiha maibé iha difikuldade seluk mak ami hasoru, liu-liu ita-nia komunidade hosi parte liman loos protesta sira-nia rai. Iha ne’e sira la simu tanba kuandu ami halo moru ne’e tama liubá sira-nia rai, sira hato’o protesta mai ami katak ida-ne’e ami-nia rai labele halo to’o iha ne’e. Maibé, bazeia ba dezenu halo moru protesaun ne’e tenke halo loos de’it no labele hlao kle’uk fali, aban bainrua ita problema fali. Tanba ne’e, ita-nia Governu liuhosi Ministériu Obra Públika, sira mai buka atu rezolve ba prosesu ne’e,” nia hateten.

Entretantu, Responsavel ba konstrusaun moru protesaun iha aldeia Mota Ulun, suku Becora, postu administrativu Cristo Rei, munisípiu Dili, katak prosesu ne’e liuhosi Ministériu Obra Públika (MOP) hodi kontrata Kompañia Santana Diak Unipesoál, Lda, hodi kostrui moru protesaun ba mota iha aldeia Mota Ulun ho totál orsamentu $406,138.99 ho nia durasaun loron 365.

Jornalista : Nelia Fernandes

Editór      : Cancio Ximenes

iklan
iklan

Leave a Reply

iklan
error: Content is protected !!