Governu-UNFPA fornese ToT ba funsionáriu 200 rekolla dadus populasaun 2022
DILI, 16 agostu 2022 (TATOLI)—Governu liuhosi Ministériu Finansa (MF) Departamentu Nasionál Estatístika no parseiru dezenvolvimentu Fundo de População das Nações Unidas (UNFPA-sigla portugés) fornese Training of Trainer (ToT) ba funsionáriu voluntáriu 200, molok dezloka ba terrenu hodi rekolla dadus sensu populasaun 2022.
Diretór Jerál Estatístika, Elias dos Santos Ferreira, hateten antes formandu sira-ne’e dezloka ba aldeia hotu-hotu iha nasaun ida-ne’e atu rekolla dadus sensu nian, ekipa ne’e sei tuir formasaun durante loron hitu (7) ne’ebé sei hahú hosi 26 agostu to’o 02 setembru 2022.
“Ami fornese atividade formasaun ToT ba funsionáriu voluntáriu 200 durante loron hitu no atividade ne’e sei lidera hosi tékniku Estatístika nian no UNFP,” Elias Dos Santos Pereira relata relatóriu, iha sala reuniun IOB, Manleuana, tersa-ne’e.
Nia hateten, departamentu estatístika no parseiru ne’e iha disponibilidade hodi fornese matéria iha formasaun ne’ebé foka liu ba oinsá atu utiliza tablet hodi rekolla dadus iha terrenu, no estatístika mós prepara pergunta hodi entrevista komunidade kona-ba dadus.
Reprezentante Interina UNFPA iha Timor-Leste, Domingas Bernardo, hateten dadus kona-ba populasaun importante liu atu iha nasaun hotu-hotu espesialmente iha Timor-Leste.
“Hanesan onra no priviléjiu boot ida mai ha’u hodi lori UNPFA iha Timor-Leste nia naran hodi mai ko’alia ho ita-boot sira iha ámbitu Abertura ba Training of Trainer ba sensu populasaun no uma-kain 2022. Hanesan ita hatene sensuspopulasaun no uma-kain ne’e hanesan ezersísiu kolesaun dadus ne’ebé importante tebes ba nasaun hotu-hotu inklui Timor-Leste,” nia dehan.
Dadus kona-ba sensu ne’e iha benefísiu boot tebes ba Governu tanba liuhosi dadus hirak-ne’e Governu sei uza hodi kria lei ba setór importante sira hanesan saúde, edukasaun no ekonómia no aloka orsamentu jerál sira no planeamentu ba dezenvolvimentu sira seluk.
“Semana kotuk ita hahú ona Master Training ba semana ida, no ita-nia treinadór sira-ne’e prapara di’ak ona no ha’u fiar katak matenek sira-ne’ebé sira hetan ne’e sei fahe tutan fali ba ita-boot sira no ita-boot sira sei ba fahe tutan fali ba enumeradór sira,” nia dehan.
Atu hetan dadus ho kualidade di’ak, depende tebes ba formandu sira, nune’e imi uza didi’ak oportunidade ida-ne’e hodi aprende no komprende didi’ak termu tékniku sira kona-ba sensu nian.
“Se ita-boot sira hetan difikuldade bele husu ita-nia konsultór internationál sira-ne’ebé expertu tebes iha sira-nia área no ha’u fiar sei responde pergunta sira ho di’ak,” nia hatutan.
Sensu populasaun no uma kain 2022 tinan-ne’e sei la hanesan ho sensu tinan hirak liubá, tanba sei foti dadus no uza tablet mak atu hetan data ne’ebé mak ho kualidade di’ak.
“Ita persiza ita-nia enumeradór sira ho kuiñesimentu ne’ebé mak adekuadu. Atu atinje objetivu sensu ho dadus di’ak, ita-boot sira mós hanesan papel importante. Ho ne’e ha’u espera programa trainementu ida-ne’e la’o ho susesu no ita bele hetan dadus kualidade hodi suporta Governu Timor-Leste hodi kria polítika no planu dezenvolvimentu ne’ebé mak di’ak.
Jornalista : Osória Marques
Editór : Cancio Ximenes
