VIQUEQUE, 16 agostu 2022 (TATOLI)–Prezidente Konsellu Veteranu munisípiu Viqueque, Adriano Camra ‘Lentil’, informa, to’o agora konsege verifika dadus antigu veteranu rejistadu iha tinan 2009 hamutuk 7.775.
“Ita halo verifikasaun 7.775, maibé foin lalais ema 3.000 resin la verifika sira-nia naran ne’ebé rejista iha tinan 2009,” Prezidente Konsellu Veteranu munisípiu Viqueque hateten iha ninia knaar fatin, Viqueque vila, tersa ne’e.
Ministériu kompetente maka sei forma fali ekipa ida hodi haree planu aban bainrua halo fali verifikasaun ba ema 3.000 resin ne’ebé foin lalais mai halo verikasaun sira-nia naran.
“Ita la hatene tanba sá hirak ne’e la mai verika, sira naran iha lista, maibé sira la mai verifika razaun saida, dala ruma juramentu ne’e maka sira la mai, ka sira la partisipa maka sira naran rejistu. Tanba ne’e maka sira la mai verika, veteranu falsu ka veteranu loos ida-ne’e maka ita labele hatene. Ministériu tenke kria fali planu hodi ema 3.000 resin ne’e mai tuir fali verifikasaun,” nia akresenta.
Notísia relevante: Prosesu verifikasaun dadus veteranu rejistadu 2009 iha Ermera seidauk termina
Dadus veteranu munisípiu Viqueque hosi postu lima verifika ona ema 3.000 resin, enkuantu 3.000 resin seluk seidauk verifika no dadus ne’ebé verifika lori ona ba nasionál.
“Balun seidauk verifika tanba sira serbisu iha Dili no sira-nia sasin ne’e mós iha Dili, maibé ba munisípiu Viqueque verifika ona ema 3.000 resin,” nia tenik.
Jornalista : Vitorino Lopes da Costa
Editora : Julia Chatarina
