LIQUIÇÁ, 16 agostu 2022 (TATOLI)—Diretór Ezekutivu Timor Port SA, Laurent Palayer, informa, konstrusaun Portu Tibar la’o hela no tuir planu sei inaugura iha tinan ne’e.
“Ita-nia progresu konstrsaun Portu Baía Tibar serbisu agora la’o hela no fulan-jullu nia rohan konstrsaun fíziku ita atinje ona 89%. Governu Timor-Leste sei halo inagurasaun iha loron 28 novembru 2022,” Responsável empreza ne’e hateten ba Agência Tatoli, iha Portu Tibar, tersa ne’e.
Ba instalasaun mákina operasionál ne’e ramata ona iha juñu 2022 no agora hela de’it 11% mak seidauk.
“Ita kontinua de’it kompleta serbisu kma’an sira hanesan haree ba edifísiu balun ne’ebé sei presiza halo kompletu hanesan tau meza, kadeira no tau internet konesaun fiu sira. Nune’e, halo konesaun ba liña eletrisidade, bee-moos, fó formasaun ba traballadór sira kompostu hosi tékniku informátika no finansa adminstrasaun,” nia akresenta.
Notísia relevante: Jerente Timor Port espera konstrusaun fíziku Portu Tibar termina iha novembru 2022
Nia dehan, molok inaugura, atividade ne’ebé sei halo mak koko ekipamentu dahuluk hanesan kontentór iha postu no seluk tan iha loron 30 agostu.
“Maneira koko, ita hatama ró halo operasaun hanesan baibain iha Portu Dili hodi koko sistema sira ne’e la’o loos ona ka lae, nune’e molok inaugura, ami komunika ona ba ró na’in sira ne’ebé hatama sasán, karik la liu ba Portu Dili maibé mai hotu iha Tibar atu koko. Semana ida molok hahú go live ne’e sira koko ekipamentu hotu ho fasilidade ne’ebé mak iha iha loron 15 setembru molok inaugura no operasaun loloos iha loron 28 novembru 2022,” Laurent Palayer relata.
Daudaun ne’e, parte Timor Port halo ona rektrutamentu ba traballadór sira ne’ebé maioria timor-oan inklui balun estranjeiru hamutuk 200, atu serbisu iha portu hanesan operadór ba mákina no área seluk tan, balun hahú serbisu ona no balun sei iha treiamentu nia-laran.
“Importante tebes ba dezenvolvimentu nasaun Timor-Leste tanba hotu-hotu hatene Portu Dili ladún fasilita atividade ekonomia. Nune’e bainira Portu Tibar ne’e hahú, maka sei iha kondisaun di’ak tebes atu fasilita ita-nia atividade komérsiu inklui fasilita ba ró sira ne’ebé liga ba ita-nia nasaun viziñu hanesan Austrália no seluk tan,” nia dehan.
Konvidadu ne’ebé sei partisipa iha inagurasaun Portu Tibar ne’e mak hanesan Prezidente Repúblika, Primeiru-Ministru, membru Governu sira, parseiru importadór sira, inklui komunidade ne’ebé hela besik iha Tibar.
Iha loron 30 agostu 2018, Primeiru-Ministru, Taur Matan Ruak, halo lansamentu konstrusaun Portu Tibar no tuir planu finaliza konstrusaun iha maiu 2022, maibé tanba situasaun pandemia halo prosesu la’o neneik.
Portu Tibar lokaliza iha kilómetru 10 hosi Oeste Dili, iha Baía Tibar, munísipiu Liquiçá, ne’ebé hanesan infraestutura prioritária ne’ebé indetifika ona iha Planu Estratéjiku Dezenvolvimentu Nasionál (PEDN) 2011-2030.
Projetu ne’e hanesan konstrusaun nível internasionál, ne’ebé ezekuta liuhosi Timor-Port S.A ho modalidade Parseria Públika Privada (PPP), ne’ebé halo konsórsiu ho Bolloré no Governu Timor-Leste.
Ba konstrusaun ne’e Governu aloka millaun $130, enkuantu Timor Port no Bolloré hamutuk millaun $150, ho totál millaun $280 ba faze inísiu.
Enkuantu, totál investimentu orsamentu ba Portu Tibar to’o tinan 30 ho valór millaun $500.
Jornalista : Arminda Fonseca
Editora : Julia Chatarina
