DILI, 16 agostu 2022 (TATOLI)—Governu Timor-Leste no Ajénsia Kooperasaun Internasionál Japaun (JICA, sigla Inglés), tersa ne’e, asina ona akordu subvensaun públika ho montante millaun $74 ba programa reabilitasaun urjente infraestrutura ne’ebé hetan estragu hosi inundasaun.
Akordu ne’e asina hosi Ministru Finansa, Rui Augostu Gomes no Ministra Negósiu Estranjeiru no Kooperasaun, Adaljiza Magno, Embaixadór Japaun, Masami Kinefuchi no Reprezentante JICA, KO Goto.
“Mudansa klimátika ne’e reál, hanesan país illa kiik, Timor-Leste sofre hosi diversifikasaun ekonómiku no esportasaun ne’ebé limitadu, risku ba impaktu mudansa klimátika, dezastre naturál no ita-nia infraestrutura ezistente la konstrui atu reziste ka tahan hasoru xoke sira ne’e,” Ministru Finansa hateten iha ámbitu asina akordu, ne’ebé hala’o iha salaun Ministériu Negósiu Estranjeiru no Kooperasaun (MNEK), Praia dos Coqueiros.
Notísia relevante: JICA kontribui millaun $7,4 reabilita urjente infraestrutura kauza kalamidade
Serimónia asinatura akordu ne’e akontese iha ámbitu selebrasaun tinan-20 lasu amizade no solidaridade entre Governu Timor-Leste no Japaun.
Governante ne’e dehan, xoke kauza hosi siklaun tropikál Seroja iha tinan kotuk rezulta inundasaun no rai-halai iha kapitál Dili inklui munisípiu sira, ne’ebé iha ema 40 resin mak lakon vida no infraestrutura ne’ebé hetan estragu hamutuk millaun $308, kuaze 9% hosi país nia Produtu Internu Brutu (PIB).
“Vulnerabilidade hirak ne’e ita bele redús liuhosi investimentu ne’ebé adekuadu, koñesimentu tékniku no apoiu imediata,” nia akresenta.
Iha biban hanesan, Embaixadór Japaun, Masami Kinefuchi, hateten hafoin akontese inundasaun iha tinan kotuk, ho pedidu hosi Primeiru-Ministru, Japaun haruka ona ekipa péritu JICA hodi halo avaliasaun ba infraestrutura ne’ebé hetan estragu no prepara projetu reabilitasaun sira. Nune’e ekipa aprezenta ona planu ida atu halo Dili sai sidade furak, seguru no reziliente.
“Governu Japaun husu JICA atu implementa serbisu reabilitasaun urjente ba infraestrutura hetan estragu, ne’ebé antes ne’e JICA identifika ona iha fatin haat, hanesan reabilitasaun barrajen mota, sistema abastesimentu bee, no sistema irrigasaun rua. Ha’u espera katak serbisu sira urjente ne’e sei tuir hotu planu,” Diplomata ne’e tenik.
JICA nia kontribuisaun finanseira ho montante millaun $7,4 sei uza hodi finansia komponente importante tolu hanesan reabilitasaun fasilidade abastesimentu bee-moos ho kustu estimativa millaun $1,1, ne’ebé orsamentu sei uza hodi hadi’aa infraestrutura bee iha kapitál Dili ne’ebé hetan estragu no pertubasaun kauza hosi inundasaun iha abril tinan kotuk, inklui ligasaun kanu ho naruk kilómetru 2,7 hosi sistema kaptasaun bee-moos ba unidade distribuisaun água potável ba konsumu públiku, reabilitasaun barrajen Mota Comoro ne’ebé mak bee lori durante inundasaun ho kustu estimativa millaun $2,3.
Barrajen ne’e halo ho objetivu atu trava inundasaun bainhira akontese udan-boot no mós atu hatán ba preokupasaun seguransa ba komunidade ne’ebé mak hela besik Mota Comoro, reabilitasaun sistema irrigasaun Buluto and Maliana ho kustu estimativa millaun $2,9, ne’ebé orsamentu ne’e sei uza hodi hadi’a sistema irrigasaun ne’ebé mak fornese bee ba natar hodi garantia seguransa alimentár.
Konsellu Ministru iha loron 22 juñu liubá autoriza selebra akordu kontribuisaun finanseira entre Governu Timor-Leste no JICA, ba programa reabilitasaun urjente infraestrutura ne’ebé hetan estragu hosi inundasaun.
Jornalista : Antónia Gusmão
Editora : Julia Chatarina
