iklan

NASIONÁL, HEADLINE, LEI

Governu altera estrutura orgánika INAP

Governu altera estrutura orgánika INAP

Edifísiu Palasiu Governu. Imajen Tatoli/Francisco Sony

DILI, 17 agostu 2022 (TATOLI)—Ministru Prezidénsia Konsellu Ministrus, Fidelis Manuel Leite Magalhães, aprezenta projetu dekretu-lei iha reuniaun Konsellu Ministru (KM), kuarta ne’e, kona-ba alterasaun dahuluk ba dekretu-lei númeru 15/2017, loron 17 maiu, ne’ebé kria no define estrutura orgánika Institutu Nasionál Administrasaun Públika (INAP).

“Ho diploma ne’e, hakarak atribui ba institutu públiku ne’e, tuir programa Governu nian, ho responsabilidade boot ba nível formasaun ne’ebé kualifikada ba rekursu umanu iha administrasaun públika, liuliu hodi fó programa sira lideransa nian no programa kapasitasaun avansada iha administrasaun públika,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu.

Notísia relevante: INAP kapasita funsionáriu na’in-25 kona-ba jestaun eskritóriu iha Baucau

Misaun foun INAP nian ba nível formasaun profisionál iha administrasaun públika ne’e hakarak reforsa formasaun profisionál hanesan instrumentu estratéjiku modernizasaun no transformasaun ba administrasaun públika, liuhosi estabelesimentu área estratéjika sira ba formasaun.

INAP hanesan instituisaun ida ho personalidade jurídika própria, ho autonomia sientífika no administrativa, sub tutela direta ba ministériu ne’ebé iha ligasaun ho administrasaun públika, ne’ebé garante formasaun, valorizaun no sertifikasaun profisionál espesífika funsionáriu, traballadór administrasaun públika, líder poder lokál no líder komunitária sira.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!