iklan

DILI, POLÍTIKA

Horta hakarak labarik feto ida asume pozisaun PR iha “loron mundiál labarik feto”

Horta hakarak labarik feto ida asume pozisaun PR iha “loron mundiál labarik feto”

Prezidente Repúblika, José Ramos Horta, hala’o enkontru ho Country Director Plan International, Dillyana Ximenes, iha Palásiu Prezidensiál Nicolau Lobato, Bairru Pite, kuarta (17/08). Imajen Tatoli/Egas Cristovão.

DILI, 17 agostu 2022 (TATOLI)—Prezidente Repúblika (PR), José Ramos Horta, hakarak labarik feto ida asume pozisaun iha komemorasaun loron mundiál labarik feto iha 11 outubru tinan ne’e.

“Prezidente Repúblika hakarak atu labarik feto ida hola pozisaun nu’udar Prezidente Repúblika hodi komemora loron mundiál ba labarik feto ne’ebé sei monu iha loron 11 outubru,” Country Director Plan International Timor-Leste (PITL), Dillyana Ximenes, hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite, kuarta ne’e.

Xefe Estadu hakarak labarik feto ne’e bele hola pozisaun iha momentu ruma no hala’o nia kna’ar nu’udar Prezidente Repúblika no Xefe Estadu atuál iha nia sorin hodi akompaña iha ambitu komemorasaun loron mundiál labarik feto.

Prezidénsia Repúblika oferese fatin iha resintu oin atu komemora loron mundiál refere, no oferese fatin atu labarik feto sira kuaze na’in-40 mai hosi munisípiu Aileu, Ainaro, Covalima, Baucau no RAEOA bele enkontru iha salaun balun iha Palásiu Prezidensiál ida-ne’e.

“Kona-ba loron bainhira mak ami nia oan feto sira-ne’e bele mai hola pozisaun ida-ne’e ami rona hosi Xefe Estadu,” nia hateten.

Iha tinan rua liubá reprezentante labarik feto mai hosi  Maubisse-Ainaro hodi asume kargu PR iha eventu komemorasaun loron mundiál refere, nune’e ba tinan ne’e sei haree labarik hosi Aileu ne’ebé sei iha identifikasaun.

Plan Internasionál ninia meta mak avansadu direitu labarik no Igualidade ba labarik feto hodi ida ne’e mak Plan ninia programa sira liu-liu labarik feto ho diversidade sai alvu ba atividade ne’ebé iha.

Tan ne’e parseiru hotu no Governu servisu atu asegura katak labarik feto no mane sira ho diversidade bele goja sira-nia direitu ho di’ak.

Kona-ba envolvimentu labarik iha servisu ne’ebé la tuir sira-nia idade saida mak Plan Internasionál halo liuhosi atividade sira hanesan foku ba protesaun labarik, atu fó kuiñesimentu ba inan-aman sira, ba komunidade kona-ba halo oinsá bele fó protesaun ne’ebé di’ak ba labarik sira bazea ba sira-nia idade.

“Ita hotu hatene, ita ema inklui labarik sira iha direitu ba partisipasaun entaun tuir sira-nia idade sira bele partisipa iha atividade sira-ne’ebé iha sira-nia moris,” nia hateten.

Kona-ba labarik sira-ne’ebé faan sasán iha dalan ninin asaun ne’ebé Plan Internasionál ho  parseiru sira nafatin halo liuhosi nia atividade balun fó hanoin ba inan-aman sira atu foku ba labarik sira tenke ba eskola, sira tenke hetan hahan ne’ebé sufisiente no tenke iha tempu halimar.

“Bainhira partisipa ba atividade ekonómia ruma, ne’e mós tenke sira hala’o tiha lai sira-nia eskola, deskansa di’ak, han di’ak sira bele ajuda uitoan bazea ba sira ninia idade,” nia fó hanoin.

Nia agradesimentu ba PR ne’ebé fó fiar Plan Internasionál atu la’o hamutuk hodi hala’o kampaña espesiál atu hasa’e nutrisaun no hamenus  má-nutrisaun iha Ainaro.

Jornalista : Nelson de Sousa

Editór      : Cancio Ximenes

iklan
iklan

Leave a Reply

iklan
error: Content is protected !!