ISPA no diareia rejista aas iha Sentru Saúde Guisarudu
DILI, 17 agostu 2022 (TATOLI)— Saúde Komunitária Komandante Martinho da Silva “Guisarudu”, postu administrativu Hatulia B, munisípiu Ermera, iha fulan-jullu rejista pasiente moras Infesaun Vias Respiratóriu ka ISPA na’in- 403 no diareia na’in-57.
“Iha jullu, ami rejista pasiente moras maioria mak infesaun vias respiratóriu hamutuk 403, kompostu hosi mane 189 no feto 214 inklui pasiente diareia na’in-57. Pasiente hirak ne’e maioria labarik sira ne’ebé tinan lima mai kraik” Xefe Sentru Saúde ne’e hateten ba Agência TATOLI via telefónika, kuarta ne’e.
Alende ne’e, nia informa sentru ne’e mós rejista moras kulit ne’ebé afeta ba labarik no ema boot, inklui deteta mós pasiente tuberkoluze na’in-tolu.
“Ami halo atendimentu iha de’it sentru saúde, maibé ba sira ne’ebé médiku ka infermeiru sira identifika katak ho problema moras tuberkoluze ami halo transferénsia ba munsípiu Ermera atu hasai raiu-x mobile hodi kontinua kedan ho tratamentu intesivu,” nia esplika.
Pesoál saúde sira ne’ebé mak hala’o kna’ar iha sentru saúde komunitária Guisarudu, Hatulia B na’in-40 resin, kompostu husi médiku, Enfermeiru, Parteira ne’ebé fó atendimentu ba komunidade sira iha postu saúde hanesan Fatubolu Lisapat, Urahou, Mau-ubu no Fatubesi.
Notísia relevante: Sentru Saúde Hatulia B enfrenta problema ekipamentu médiku
Jornalista : Felicidade Ximenes
Editór : Florencio Miranda Ximenes
