iklan

NASIONÁL, JUSTISA, DILI, HEADLINE

MJ husu PN altera lei kombate tráfiku no konsumu ilísitu droga

MJ husu PN altera lei kombate tráfiku no konsumu ilísitu droga

Ministru Justisa, Tiago Amaral Sarmento. Imajen Tatoli/Francisco Sony

DILI,17 agustu 2022 (TATOLI) – Ministru Justisa (MJ), Tiago Amaral Sarmento, husu reprezentante povu iha uma fukun Parlamentu Nasionál, atu halo alterasaun ba Lei númeru 2/2017 kona-ba kombate tráfiku no konsumu ilísitu droga.

Governante ne’e husu, ba oin Parlamentu Nasionál  presiza halo alterasaun ba artigu balun hosi lei númeiru 2/2017 tuir evolusaun mundu ohin loron nian kona-ba droga.

“Sé bele Parlamentu Nasionál halo alterasaun  lei númeiru 2/2017,  hasa’e tán nia pena ba kazu droga, no  haree mós  ba nia mekanizmu sira, hanesan julgamentu ba kazu droga tenke ho juis koletiva, la’os Juiz singulár. Kuandu  juiz singulár de’it, automatikamente tenke halai ba Termu Identidade Rezidénsia, sé juiz koletiva ne’e dalaruma bele ba prizaun preventiva,” nia ko’alia iha  Palásiu Governu, kuarta ne’e.

Tuir nia, droga ne’e la’os estraga ema-boot, ema-ki’ik, ferik no katuas sira, maibé droga ne’e estraga labarik-kik sira-nia vida hotu.

Ministru Justisa ne’e kritíka akuzasaun Ministériu Públiku nian hasoru arguidu na’in-sia tanba akuzasaun la forte, ikus mai tribunál foti desizaun aplika medida koasaun Termu Identidade Rezidénsia (TIR).

“Ministériu Justisa hakfodak, bainhira prokuradór sira uza fali artigu ne’ebé pena la maka’as hodi akuza fali arguidu sira no Ministériu Justisa nia preokupasaun Ministériu ba Públiku akuza fila-fali arguidu sira hosi artigu seluk hosi lei ilísitu ba droga, ikus mai akuzaun ministériu públiku nian la vale,” nia lamenta.

Governante ne’e argumenta, artigu 7 hosi Lei númeiru 2/2017 -ilísitu ba droga ne’e forte, tanba iha artigu ne’e hateten, ema-ne’ebé tuur iha uma maka uza droga no la presiza droga ne’e haruka hosi ne’ebé,  nia pena prizaun ne’e tinan (2) to’o tinan (12).

Tanba, iha artigu 7 hosi lei númeiru 2/2017 ne’e esplika, se de’it maka uza droga tuur de’it iha ameasa ho pena tinan (2) to’o tinan (12).

“Ministru Justisa enkoraja no rekomenda ba Ministériu Públiku atu atensaun didi’ak ba lei-númeru 2/2017, nune’e halo akuzasaun karik, tenke ho prova sira hotu ne’ebé regula iha lei 2/2017. Tanba lei ne’e rasik forti tebes, liuliu artigu 7. Sé lae ita-nian komunidade hanoin katak, ita-nia lei ba droga laiha,” Ministru Justisa Tiago Amaral Sarmento argumenta.

Governante ne’e fó-sai katak, iha momentu sira hanesan ne’e, labele fó sala ba juiz sira, tanba juiz ne’e tesi-lia bazea ba prova ne’ebé aprezenta hosi Ministériu Públiku.

Tuir Rejimentu Parlamentu Nasionál katak, atu hamosu inisiativa ba alterasaun ba lei ruma la’os parlamentu nasionál de’it, bele mai hosi Governu.

Jornalista : Natalino Costa

Editor        : Evaristo Soares Martins

iklan
iklan

Leave a Reply

iklan
error: Content is protected !!