PR Horta vizita Parlamentu Nasionál
DILI, 17 agostu 2022 (TATOLI)—Prezidente Repúblika (PR), José Ramos Horta, kuarta ne’e, hala’o vizita ba Parlamentu Nasionál hodi haree besik kondisaun servisu no hala’o enkonru ho Prezidente Parlamentu Nasionál, Aniceto Longuinhos Guterres Lopes, hodi diskute asuntu Estadu nian.
“Ami iha audiénsia hanesan baibain no ha’u mak husu audiénsia ne’e maibé Prezidente Repúblika mak hakarak mai Parlamentu aproveita vizita haree kondisaun Parlamentu ninian,” Prezidente PN, Aniceto Guterres, hateten ba jornalista sira iha resintu PN.
Vizita ne’e simu direta hosi Prezidente Parlamentu Nasionál, akompañadu hosi Sekretáriu Jerál PN no kargu xefia iha PN no hafoin Prezidente PN tara tiha tais, PR hala’o kedas vizita hodi observa servisu divizasaun sira iha PN.
Aniceto Guterres hateten, durante reuniaun ko’alia asuntu Estadu nian liu-liu iha loron rua tan nia-parte ho delegasaun atu ba Indonézia hodi vizita Parlamentu Indonézia ka Dewan Perwakilan Rakyat (DPR) Indonézia.
“Ne’ebé ha’u husu orientasaun mós ba Prezidente Repúblika no ko’alia pontu importante ruma liga ba asuntu Estadu nian,” nia dehan.
Prezidente Repúblika, José Ramos Horta, hateten nia-parte gosta mós sai hosi Palásiu Prezidensiál hodi PN atu observa kondisaun servisu no hala’o enkontru ruma ko’alia asuntu Estadu nian.
Nune’e, fó hanoin ba Prezidente Parlamentu hodi bele fó hanoin fali ba Prezidente Parlamentu Indonézia kona-ba relasaun Estadu rua ne’e, follow up ba vizita ne’ebé Xefe Estadu halo presizamente oinsá halo segimentu ba akordu ne’ebé Timor-Leste halo ho Indonézia foin daudaun.
Ho ida-ne’e, oinsá prepara halo follow up ba proposta ne’ebé Prezidente Repúblika Indonézia, Joko Widodo hala’o entermu atu haree parte industriál iha fronteira Timor-Leste ho Nusa Tengara Timur (NTT) no zona komérsiu livre iha Oé-Cusse,
“Tanba Prezidente Joko Widodo la’ós ema ne’ebé ko’alia de’it maibé nia ko’alia ita ko’alia halo hetan simu ideia nia hakarak haree implementasaun nune’e ko’alia konkretu ba prosesu rua,” nia hateten.
Antes ne’e PR partilla ona kestaun refere ba membru VIII Governu relevante, Primeiru-Ministru, no sei ko’alia ho eis Primeiru-Ministru (PM), Mari Alkatiri, no eis PM Xanana Gusmão.
“Tanba buat sira-ne’e kestaun Estadu no interrese ba Timor, ba ita-nia dezenvolvimentu ekonomia modernizasaun. Ita besik atu tama ona ASEAN, se ita la halo buat ruma depois ita mak sei ikun liu,” nia hateten.
Iha parte seluk, ko’alia mós insiativa fraternidade umana ne’ebé Timor-Leste hanesan nasaun dahuluk ne’e liuhosi Parlamentu Nasionál adota rezolusaun hodi adota iha Timor-Leste, nune’e bele partilla mós durante vizita PN Timor-Leste iha PN Indonézia.
Entertantu, PR vizita PN ne’e rona mós servisu instalasaun PN nian no PR espera katak iha tinan 2023 bele hahú ona konstrusaun edifísiu foun PN nian.
Jornalista : Nelson de Sousa
Editór : Cancio Ximenes
