Edukasaun Covalima distribui diploma 2.772 ba estudante finalista 2021
COVALIMA, 18 agostu 2022 (TATOLI)–Servisu Edukasaun Munisípiu Covalima liuhosi Departamentu Dezenvolvimentu Jestaun Parke no Eskolár distribui ona diploma 2.772 ba estudante finalista tinan fiskál 2021.
“Ha’u hanoin Servisu Edukasaun Munisípiu Covalima distribui ona diploma ba estudante finalista ne’ebé ramata sira-nia estudu iha tinan fiskál 2021 iha munisípiu Covalima hamutuk 2,772 ne’ebé mai hosi eskola sira hanesan ensinu báziku, eskola sekundáriu jerál no eskola Tekniku vokasionál,” Xefe Departamentu Dezenvolvimentu Jestaun Parke no Eskolár, Manuel Costa França, relata dadus ne’e ba Agência Tatoli, iha nia kna’ar fatin Santa-Rosa, kinta ne’e.
Estudante Finalista hamutuk 2,772 mai hosi eskola hanesan eskola ensinu báziku hamutuk 1,617, eskola sekundáriu jerál hosi siénsia teknolojia hamutuk 468, siénsia sosial umanidade 387 no hosi eskola tekniku vokasionál hamutuk 300.
Servisu Edukasaun distribui de’it diploma ba eskola sira maibé ba estudante finalista na’in hira mak simu ona no balun seidauk simu, ida-ne’e eskola ida-idak nia responsabilidade hodi distribui diploma ba finalista sira.
Tanba, tuir nia, durante ne’e servisu edukasaun Covalima halo atendimentu ba estudante sira ne’ebé legaliza sira-nia diploma la’ós hodi tinan fiskal 2021 maibé balun hosi tinan fiskal 2019 no 2020.
Estudante finalista sira mai legaliza sira-nia diploma iha Servisu Edukasaun Munisípiu Covalima rai de’it arquivu hodi halo separasaun estudante finalista hosi eskola Sekundáriu Jerál Públiku no estudante finalista hosi eskola Tekniku Vokasionál no EBC
“Atu rekola dadus ba estudante finalista sira-ne’ebé mak foti ona sira-nia diploma no seidauk, ami sei halo koordenasaun ho diretór eskola sira nune’e bele hatene tuir estudante sira-ne’ebé foti ona sira-nia diplom,” nia dehan.
Jornalista : Celestina Teles
Editór : Cancio Ximenes
