DILI, 18 agostu 2022 (TATOLI)—Estadu Unidu Amérika (EUA), liuhusi Ajénsia Estadu Unidu ba Dezenvolvimentu Internasionál (USAID),apoia fundu adisionál $600,000 ba Ministériu saúde atu reforsa sistema saúde iha Timor Leste.
“Ami nia kontribuisaun foun ida ne’e apoia fundu adisionál ba Ministériu Saúde $600,000 hodi reforsa liutan sistema saúde iha Timor Leste,” katak Enkaregadu Negósiu Embaixada EUA, Tom Daley, ba jornalista sira iha Salaun Ministériu Saúde-Caicoli, kinta ne’e.
Osan adisionál ne’e atu fasilita atiivdade Ministériu Saúde nia hodi habelar informasaun ba ema sira ne’ebé mak sei duvida hela ho vasinasaun COVID-19. Nune’e ho orsamentu ne’e apoiu profisionál saúde sira fó sai infomasaun ba komunidade sira atu konvense hodi simu vasinasaun ba COVID-19.
Fundu ne’e fó apoiu ba kontinuasaun servisu esensiál saúde inan, kosok-oan sira nian no saúde labarik nian iha nasaun laran tomak hodi reforsa seguransa saúde.
Alende ne’ e, finansiamentu ne’e sei aumenta tan apoiu ba kampaña vasinasaun COVID-19 nian ba populasaun sira ne’ebé elijível, hadi’a prevensaun no kontrolu ba infesaun sira iha sentru saúde komunitária sira no promove prevensaun COVID-19.
Iha fatin hanesan, Ministra Saúde, Odete Freitas Belo, hateten Ministériu Saúde apresia apoia EUA liuhosi USAID tanba fasilita tebes hodi reforsa servisu pesoál saúde sira iha munisípiu hotu inklui RAEOA hodi responde ba pandemia COVID-19 no hasa’e partisipasaun komunidade sira nian iha kampaña vasina COVID-19.
“Ohin, ita nia parseiru nasaun Estadu Unidu Amérika (EUA) liuhosi Embaixada no organizasaun USAID apoia ita ho fundu adisionál $600,000 atu responde ba pandemia COVID-19 no hasa’e partisipasaun komunidade sira nian iha kampaña vasina,” nia agradese
Dezde pandemia ne ‘e hahú, Estadu Unidu Amérika serbisu hamutuk ho Governu Timor-Leste hodi fornese liu millaun $7.4 iha asisténsia krítiku atu kombate COVID-19 inklui vasina Pfizer liu doze 200,000.
Jornalista : Felicidade Ximenes
Editór : Florencio Miranda Ximenes
