Governu oferese transporte no komputadór hodi mellora servisu sosiál iha RAEOA
OÉ-CUSSE, 18 agostu 2022 (TATOLI) – Governu liuhosi Vise-Primeira Ministra no Ministra Solidariedade Sosiál no Inkluzaun (MSSI), Armanda Berta dos Santos, akompaña ho Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, kinta ne’e entrega ekipamentu motorizada no komputadór ba tékniku ofisiál siran-e’ebé destakadu iha sub-rejiaun Oésilo, Pássabe Nítibe no Pante Makasar hodi mellora serbisu sosiál iha baze.
Armanda Berta Dos Santos, esplika, ekipamentu hirak-ne’e komposta hosi motorizada no komputadór ne’ebé mak hetan aprovasaun hosi Parlamentu Nasionál iha 2021, entaun fahe ba munisípiu 12 no RAEOA ba postu administrativu 65 iha Timor-Leste.
“Durante ne’e iha difikuldade tanba distánsia dook, entaun ita sosa motorizada ho komputadór fasilidade ekipamentu ba nesesidade ne’ebé mak persiza, liuliu iha RAEOA, tanba asuntu sosiál iha RAEOA ha’u haree distánsia dook, ho fasilidade ohin simu sei bele ajuda ita-boot sira, halo karta ruma la persiza la’o dook ona, ida-ne’e mak atu responde problema sira-ne’ebé durante ne’e ita-boot sira hasoru iha terrenu,” Armanda Berta dos Santos, ko’alia iha serimónia distribuisaun iha salaun edukasaun Oé-Cusse.
Governante ne’e agradese ba autoridade RAEOA, tanba sempre tau matan ba asuntu sosiál, liuliu ba nesesidade komunidade nian, liga programa bolsa da mãen jerasaun foun no programa idozu invalidéz.
Prezidente Autoridade RAEOA, Arsénio Paixão Bano, agradese ba Governu sentrál tanba apoia ekipamentu ba serbisu sosiál iha Oé-Cusse, nune’e bele mellora di’ak liután serbisu Estadu nian.
“Oé-Cusse agradese ba MSSI, tanba ohin ita simu tán rekursu ba área sosiál, apoia motorizada ho komputadór, ha’u husu de’it ba depratamentu sosiál ho tékniku sira, ohin simu fasilidade ne’e, uza didi’ak, uza ba serbisu Estadu no uza ba serbisu povu Oé-Cusse,” nia orgullu.
Entretantu, fasilidade ne’ebé MSSI apoia ba tékniku destakadu sira iha sub-rejiaun haat mak hanesan, motorizada unidade haat, komputadór unidade haat kompleta ho màkina emprezora.
Jornalista: Abílio Elo Nini
Editór: Evaristo Soares Martins
