Hetan asidente tráfegu, Vise Prezidente PN baixa iha HNGV
DILI, 18 agostu 2022 (TATOLI)— Diretór Klíniku Hospitál Nasionál Guidu Valadares (HNGV), Marcelino Correia, informa, daudaun ne’e médiku espesialista hahú fó atendimentu saúde ba Vise Prezidente Parlamentu Nasionál, Deputada Maria Angelina Lopes Sarmento, hafoin hetan asidente tráfegu iha postu administrativu Laclubar, munísipiu Manatuto.
Vise Prezidente PN ne’e hetan asidente tráfegu iha loron-kuarta, 17 agostu 2022, tuku 19:00 bainhira halo viajen hosi Dili bá Laclubar ho nia família.
”Vise Prezidente Parlamentu Nasionál, Maria Angelina Sarmento,hetan asidente tráfegu iha área Manatuto no evakua ba ospitál Manatuto vila hodi halo observasaun, hafoin médiku sira halo transferénsia kedas mai iha HNGV iha tuku 12:00 ka meia noite”, katak Diretór Klíniku HNGV ne’e ba jornalista sira, HNGV-Bidau, kinta ne’e.
Daudaun ne’e, nia dehan Vise Prezidente PN ne’e baixa iha HNGV atu médiku espesialista sira fo tratamentu médiku.
“Iha observasaun médiku sira katak Vise Prezidente PN nia-kondisaun jerál di’ak hotu, maibé hetan pankada iha ain-tuur, tanba ne’e médiku sira presiza halo observasaun. Agora daudaun halo hela tratamentu saúde iha sala VIP liuliu ba hasai raiu-x no halo CT scan ba nia-ain,” nia afirma.
Ho nune’e, nia relata kondisaun saúde Vise Prezidente PN ladun grave, maibé nia ain tuur parte karuk mak moras oituan.
Vise Prezidente PN hetan asidente trágefu iha kruzamentu área Laclubar Vila ne’ebé Estrada kondisaun ladun di’ak, subida no kloot no namdoras, nune’e kodutór lakon kontrola to’o ikus hetan asidente hodi karreta monu ba iha rai naruk, kuaze metru lima.
Véikulu ne’ebé Vise Prezidente PN ho nia família uza ne’e ho marka xapa-matríkula Vise PN-1 ne’ebé lori hosi nia la’en rasik.
Hafoin akontesimentu, PNTL transporta kedas Vise Prezidente PN ho família ba postu saúde Laclubar hodi halo tratamentu.
Nune’e iha oras 23:00 kontinua transporta kedas mai iha Hospital Nacional Guido Valadares (HNGV), Dili hodi kontinua halo tratamentu.
Entretantu, karreta ho xapa-matrikula Vise PN-1 ne’e kondisaun la aproveita no daudaun sei iha fatin akontesimentu no seidauk dada-sai, tanba presiza ekipamentu pezadu atu dada sai hosi rai-naruk.
Notísia relevante: Vise Prezidente Parlamentu Nasionál hetan asidente tráfegu iha Manatuto
Jornalista : Felicidade Ximenes
Editór :Florencio Miranda Ximenes
