DILI, 18 agostu 2022 (TATOLI)–Reitór Universidade da Paz (UNPAZ), Adolmando Amaral, deklara katak kampus ramu rua iha Oé-cusse no Covalima prontu ona atu hetan avaliasaun hosi ekipa téknika sira hosi Ministériu Ensinu Superior Siénsia no Kultura (MESSK).
Reitór UNPAZ, Adolmando Amaral, hateten, kampus ramu rua haruka ona proposa ba MESSK hodi hein avaliadór sira mai halo avaliasaun, atu nune’e bele atribui lisensa operasionál.
“Ami husu ba ministériu bainhira atu halo avaliasaun ba ami-nia kampus ramu rua ne’e tenke haruka duni avaliadór sira mak mai, ami lakohi haruka fali funsionáriu baibain ida mak mai halo fali avaliasaun ba ami-nia kampus,” Reitór informa ba Agência Tatoli, via telefónika, kinta ne’e.
Notísia relevante: ANAAA lansa avaliasaun kursu iha instituisaun hitu
Tuir Adolmando Amaral, funsionáriu sira nunka hatene konteúdu padraun ba lisensa operasionál ne’ebé maka atu atribui ba kampus ramu rua, ne’ebé UNPAZ estabelese ona iha Rejiaun administrativu Espesiál Oé-cusse Ambeno (RAEOA) no Covalima.
Parte universidade nia proposta avaliasaun submete ona ba MESSK, signifika kampus ramu rua ne’e iha ona preparasaun 100%, nune’e bainhira de’it ministériu delega ekipa avaliadór sira mai halo avaliasaun ba kampus rua ne’e hodi hetan lisensa operasionál maka sira prontu no tuir informasaun ministru hatún ona despaixu avaliasaun ba Diresaun Jerál Ensinu superiór.
“Ami hetan ona informasaun katak ministru halo ona despaxu ba Diretora Jerál atu haruka ekipa tékniku sira mai halo ona avaliasaun, maibé ami husu de’it maka tenke ema tékniku,” nia akresenta.
Jornalista : Tomé Amado
Editora : Julia Chatarina
