DILI, 18 agostu 2022 (TATOLI)— Xefe Estadu Maiór Jenerál FALINTIL-Forsa Defeza Timor-Leste (F-FDTL), Falur Rate Laek no Xefe Estadu Maiór Jenerál Forsa Armada Portugál, Almirante António da Silva Ribeiro, kinta ne’e, inaugura monumentu Calma ne’ebé lokaliza iha Taibesi Dili.
Monumentu Calma ne’e hanesan monumentu ba vítima militár Portugál nian durante okupasaun iha Timor-Leste, iha área Taibesi no sai símbolu atu hametin relasaun Timor-Leste ho Portugál di’ak liután iha futuru.
Prezidente Liga Kombatente Portugal Tenente Jenerál Chico Rodriges, hateten, inagurasaun monumentu Calma iha Taibesi ne’e nudar simbolu atu hametin relasaun Timor-Leste no Portugál di’ak liutan iha futuru.
“Timor-Leste no Portugál nia relasaun ka amizade di’ak tebes ho nia-abut istória, nuen’e, ha’u hanoin inaugurasaun monumentu istóriku sei hametin di’ak liután ralasaun povu rai-rua nia istória no kooperasaun iha futuru,” Prezidente Liga Kombatente Portugál,Tenente Jenerál Chico Rodrigues, hateten iha nia intervesaun serémonia inaugurasaun monumentu Calma iha Taibesi Dili, Kinta ohin.
Nune’e, nia agradese ba Timor-Leste tanba bele prezerva ona sítiu istóriku sira ne’ebé maka uluk Portugál rai hela no bainhira Portugál hakarak hadi’a ka rebilita fatin istóriku sira Estadu TL hatudu nia protidaun atu apoia hadia fatin sira ne’e.
“Ohin, ita inaugura ona monumentu calma iha Taibesi ida ne’e hanesan fatin rate Portugés nian iha Aileu no rai ami nia patrimóniu sira seluk iha nasaun seluk banhira sei iha hela administrasaun Portugál nian, nune’e atu ami bele prezerva ami nia patrimóniu sira ne’e, hodi kontinua hametin kooperasaun bilaterál no istóriku ho rai sira ne’e,” nia kompromete.
Tenente Jenerál Chico Rodrigues,mós kongratula Estadu no Governu Timor-Leste, tanba kuida no prezerva ona fatin istóriku hosi nia rebilitasaun to’o ohin loron hetan inaugurasaun.
“Ami mós fó agradese ba iha parte komunidade no Autoridade suku Taibesi, tanba ajuda tau matan hodi kuidadu fatin istóriku no hahú husi ninian reabilitasaun komunidade Taibesi fó apoiu tebes no ohin ita bele inaugural,” nia hatutan
Iha biban hanesan, Prezidente Kosellu Kombatente Libertasaun Nasionál, Vidál de Jesus “Riak Leman”, hateten, inaugurasaun monumentu Calma ne’e iha nia signifikadu ho baseia ba istória rai rua-nian.
“Portugal ukun ita durante 450, nune’e maka inaugurasaun monumentu ne’e iha nia signifikadu nu’udar memoria Timor-Leste ho Portugál iha aspetu istória, amizade nasaun rua ne’e nia dezde uluk no sempre di’ak tebes, bainhira ita nian prosesu ba auto determinasaun Portugál kontinua apoia ita no la husik ita,” nia afirma.
Jornalista: Natalino Costa
Editór : Florencio Miranda Ximenes