DILI, 18 agustu 2o22 (TATOLI)-Komandante Polísia Nasionál Timor-Leste (PNTL), Munisípiu Manatuto, Superientendente Polísia João da Costa, fo-sai katak, Vise Prezidente Parlamentu Nasionál (PN), Deputada Maria Angelina Lopes Sarmento, hetan asidente tráfegu iha postu administrativu Laclubar, munísipiu Manatuto.
Vise Prezidente PN, Maria Angelina Samento, hetan asidente tráfegu iha loron-kuarta, 17 agostu 2022, tuku 19:00 bainhira halo viajen hosi Dili bá Laclubar ho nia família.
Nune’e derrepente iha dalan iha área kruzamentu Lacklubar Vila, Vise Prezidente PN, Maria Angelina Samento ho nia família hetan asidente tráfegu.
“Kondisaun dalan ladi’ak, subida no kloot no namdoras, nune’e kodutór lakon kontrola to’o ikus hetan asidente hodi karreta monu ba iha rai naruk, kuaze metru lima hosi estrada ba rai-naruk,” Komandante PNTL Munisípiu Manatuto, Superientendente Polísia João da Costa ba TATOLI liuhosi telefonika, kinta ne’e.
Komandante PNTL Munisípiu Manatuto ne’e hateten, karreta ne’ebé Vise Prezidente PN ho nia família uza ne’e ho marka xapa-matríkula Vise PN ne’ebé lori hosi nia la’en rasik.
“Ha’u hanoin Vise Prezidente Parlamentu Nasionál (PN), Maria Angelina ho família kondisaun di’ak, kanek ladún grave, maske karreta roda haat sa’e”, nia informa.
Hafoin akontesimentu, PNTL transporta kedas Vise Prezidente PN ho famúlia ba postu saúde Laclubar hodi halo tratamentu.
Nune’e iha oras 23:00 kontinua transporta kedas mai iha Hospital Nacional Guido Valadares (HNGV), Dili hodi kontinua halo tratamentu.
Entretantu, karreta ho xapa-matrikula Vise PN 1 ne’e kondisaun la aproveita no daudaun sei iha fatin akontesimentu no seidauk dada-sai, tanba presiza ekipamentu pezadu atu dada sai hosi rai-naruk.
Jornalista: Natalino Costa
Editor: Evaristo Soares Martins
