DILI, 19 agostu 2022 (TATOLI)–Diresaun Nasionál Dezenvolvimentu Parque Eskolár (DNDPE) iha tan planu foun ba konstrusaun Eskola Referénsia Lian Portugés, Centros de Aprendizagem e Formação Escolar (CAFE) lima iha Dili, Aileu Bobonaro, Manatuto no Viqueque iha tinan 2023.
“Iha futuru tinan 2023, ita previstu mós konstrusaun ba eskola CAFE lima, tanba ita-nia planu no dezeñu sira submete ona ba fundu infraestrutura,” Diretór Nasionál Dezenvolvimentu Parque Eskolár, Agostinho Soares, informa, iha ninia knaar fatin, Vila verde, sesta ne’e.
Tuir Diretór, eskola referénsia CAFE Dili presiza hadi’a tanba daudaun labarik sira ladún konfortável tanba espasu limitadu.
“Ita-nia labarik sira hato’o lamentasaun ne’e tanba durante ne’e parte eskola koloka balun iha eskola Xina, balun iha Comoro no seluk fali iha eskola CAFE Becora,” nia akresenta.
Notísia relevante: Profesór timor-oan 219 hanorin iha Eskola CAFE
Tanba ne’e, DNDPE iha ona planu atu halo konstrusaun eskola CAFE Dili ho andár tolu sala aula 12 inklui konstrusaun CAFE foun haat.
DNDPE submete hotu ona planu no dezeñu konstrusaun eskola CAFE lima ne’e ba Komisaun Nasionál Aprovizionamentu (CNA, sigla portugés) no kona-ba disponibilidade orsamentu ba konstrusaun ne’e depende ba Orsamentu Jerál Estadu (OJE) 2023 ne’ebé sei previstu hodi ba halo diskusaun iha Parlamentu Nasionál iha fulan-outubru.
Enkuantu, planu konstrusaun ba eskola CAFE lima ne’e mós tuir informasaun katak bazeia ba enkontru liña ministeriál iha fulan kotuk ho CNA ne’ebé sira rekomenda atu haree prosesu administrativa.
“Dalaruma relasiona ho orsamentu, maibé parte diresaun iha nafatin esperansa katak planu ne’e trasa ona sei bele realiza tanba nesesidade estudante no eskola nian tenke tau nafatin iha prioridade,” nia tenik.
Jornalista : Tomé Amado
Editora : Julia Chatarina
