DILI, 18 agustu 2022 (TATOLI)— Organizasaun Arte Marsiál Persaudaraan Setia Hati Terate (PSHT) Timor –Leste, kinta ne’e, hal’o graduasaun ba membru foun na’in-8.529 iha territóriu nasionál, ne’ebé realiza iha rejiaun haat hanesan Dili, Baucau, Maliana no Manufahi.
Prezidente PSHT Timor-Leste, Baltazar Seixas Lemos, hateten nia parte kongratula Governu Timor-Leste liuliu Sekretáriu Estadu Juventude no Desportu (SEJD) no Komisaun Reguladór Arte Marsiál (KRAM), tanba ho sira nia esforsu mak bele realiza gradusaun ne’e ho di’ak no susesu.
“Ha’u hakarak agradese ba Governu Timor-Leste liuhosi Sekretaria Estadu Juventude Desportu (SEJD) no KRAM ne’ebé bele reativa fali atividade organizasaun arte marsiál PSHT no organizasauns sira seluk hodi bele hala’o fali nia atividade iha Timor-Leste, no ohin halo seremónia graduasaun ba membru foun na’in-8.529 iha territóriu nasionál ho di’ak,” agradese Prezidente PSHT Timor-Leste ne’e iha ámbitu abertura gradusaun ba membru PSHT nain 4.529 ne’ebé halo iha Gináziu-Dili, kinta ohin.
Iha seremonia graduasaun ne’e, Responsavél másimu organizasaun PSHT ne’e husu ba membru foun PSHT ne’ebé hetan ona gradusaun tenke hatudu ezemplu di’ak iha sosiadade.
“Ha’u husu ba ita bo’ot sira, hafoin gradua no sai membru PSHT atu ita bo’ot-sira kontinua tuir duni doutrina PSHT nian hodi hatudu respeita iha ba malu iha sosiadade nia leten,” responsavél ne’e sujere.
Iha fatin hanesan, Prezidente Konsellu PSHT Sentru Madium, Issoe Biantoro, husu ba membru foun PSHT nian hodi sai membru PSHT ne’e kontribui ba pás no estabilidade atu fó benefisiu ba sosiadade no ba nasaun.
“Ita bo’ot sira bainhira sai tiha membru foun PSHT nian tenke sai autór ba pás no estabilidade hodi kontribui ba dezenvolvimentu Timor-Leste no sai ezemplu ba ema hotu,” nia afirma.
Prezidente Konsellu PSHT ne’e mós kongratula ba Governu tanba deside reativa arte marsiál PSHT no arte marsiál sira seluk hodi halo atividade no sai modalidade desportiva iha Timor-Leste.
Kontribui pás no estabilidade
Ministru Edukasaun, Juventude no Desportu (MJED), Armindo Maia, ne’ebé reprezenta Primeiru Ministru, Taur Matan Ruak, hateten lori Governu nia naran hato’o parabéns ba membru foun PSHT iha territóriu nasionál ne’e simu ona graduasaun.
“Ita nia Primeiru Ministru husu ba ita bo’ot sira, hafoin gradusaun no sai membru PSHT tenke garante ba pás no estabilidade hodi kontribui ba dezenvolvimentu nasaun nian liuliu iha setór produtivu iha Timor-Leste no tenke sai solusaun ba problema la’ós sai autór ba problema,” Governante ne’e haktuir.
Nune’e mós, Sekretáriu Estadu Juventude Desportu (SEJD), Abrão Saldanha, hato’o mós kongratula ba membru foun PSHT tomak ne’ebé, ohin simu graduasaun.
“Ba graduadu sira atu sai membru PSHT tenke sai garante pás no estabilidade hodi benefisia ba ema seluk. Ita bo’ot sira prátika loloos PSHT nian doutrina mak ema sei respeita ita bo’ot sira,” nia afirma.
Governante ne’e dehan,reativasaun arte marsiál sira atu sai parseiru Governu nian no bele organiza aan di’ak liután iha sosiadade atu sai modalidade desportiva ida iha Timor-Leste hodi partisipa kompetisaun nivél nasionál no internasionál.
Jornalista: Natalino Costa
Editór : Florencio Miranda Ximenes
