DILI, 19 agostu 2022 (TATOLI)- Jenerál Tentara Nasionál Indonézia (TNI), Muhamad Andika Perkasa, hato’o nia kongratula ba Estadu Timor-Leste tanba sei hetan medalla grau méritu iha ámbitu komemorasaun aniversáriu loron FALINTIL dala-47.
Prezidente Repúblika (PR), José Ramos Horta, kondekora jenerál na’in-tolu (3) no eis-jenerál na’in-ida (1) hosi estranjeiru ho medalla méritu.
“Ha’u hakarak hato’o obrigadu barak ba Estadu Timor-Leste, ne’ebé ho fuan bo’ot hakarak kondekora ha’u. Ha’u apresia no orgullu ba ida ne’e,” katak Jenerál TNI Andika Perkasa hafoin halo nia vizita ba iha Kuartél Jenerál F-FDTL-Fatuhada, sesta ne’e.
Tuir planu, Prezidente Repúblika (PR), José Ramos Horta, sei kondekora jenerál na’in-tolu (3) no eis-jenerál na’in-ida (1) hosi estranjeiru ho medalla méritu.
“Serimónia kondekorasaun ne’e sei hala’o iha ámbitu selebrasaun aniversáriu Forsa Armada Libertasaun Nasionál (FALINTIL) ba dala-47 iha loron 20 gostu 2022, iha Palásiu Governu Dili,” refere nota ne’e.
Kondekoradu sira mak hanesan Xefe Estadu-Maiór Jenerál Forsa Armada hosi Portugál, Almirante António Manuel Fernandes da Silva Ribeiro, Xefe Estadu-Maiór Jenerál Forsa Armada hosi Commonwealth Austrália, Jenerál Angus Campbell no Xefe Estadu Maiór Jenerál Forsa Armada hosi Repúblika Indonézia, Jenerál Andika Perkasa.
Alende ne’e, Estadu Timor-Leste sei kondekora mós eis-Ministru no eis-Xefe Servisu Nasionál Intelijénsia Repúblika Indonézia no Veteranu hosi Operasaun Seroja, Jenerál Reformadu Abdullah Makhmud Hendroprioyono.
Ba atribuisaun medalla méritu ne’e, bazea ba dekretu-lei Númeru 15/2009, loron 18 marsu atu rekuiñese no agradese ba sívil no militár, nasionál no internasionál sira-ne’ebé fó ona sira-nia kontribuisaun signifikativa ba pás no estabilidade nasionál.
Notísia relevante: TNI kompromete apoia F-FDTL iha área kapasitasaun téknika militár
Jornalista: Natalino Costa
Editór : Florencio Miranda Ximenes
