Janeiru-agostu: Postu saúde Ogues rejista kazu TBC 38
COVALIMA, 19 agostu 2022 (TATOLI)–Responsável postu saúde Ogues, Carlos da Cunha Moniz, hateten hahú hosi fulan-janeiru to’o agostu tinan ne’e, postu saúde Ogues rejista kazu Tuberkuloze (TBC) hamutuk 38.
Notísia Relevante: Janeiru-marsu: Servisu Saúde Covalima rejista kazu TBC 60
“Hahú janeiru to’o agostu tinan ne’e, bazea ba ami rekolla dadus iha postu saúde Ogues rejista kazu Tuberkuloze (TBC) hamutuk 38. Kazu ne’e ami deteta bainhira hala’o tama-sai uma no ami hein iha fatin bainhira pasiente sira konsulta dehan mear loron ida-rua, ami tenke halo teste. Tanba dala ruma sira mear semana ida mós, sira-dehan foin loron ida-rua,” Carlos da Cunha Moniz informa ba Agência Tatoli, iha postu saúde Ogues, sesta ne’e.
Postu saúde Ogues rejista kazu TBC hanesan iha aldeia sira-ne’ebé pertense ba suku Ogues entaun kontaktu ba volontáriu sira hodi informa pasiente sira-nia estatutu, nune’e sira-bele haree pasiente ne’e.
Bazea ba dadus ne’ebé mak postu saúde Ogues rejista iha janeiru to’o juñu ne’e, kazu TBC 30 no hahú iha fulan jullu to’o agostu aumenta rejista kazu ualu, tanba ne’e pesoál saúde sira esforsu atu elimina kazu TBC iha Timor-Leste.
“Ami deteta pasiénta pozitivu moras TBC, ami informa ba nia-família sira katak ko’alia no atu mear tenke taka ibun nune’e kutun labale da’et ba familia iha uma laran. Ami sei halo screening família uma laran ba sira-ne’ebe laiha sintóma ami halo tratamentu preventiva ba sira, nune’e sira labele kona moras refere,” nia dehan.
Durante ne’e pesoál saúde sira deteta kazu TBC iha suku Matai, suku Belekasak, aldeia Dais, suku Ogues, aldeia Orun, Baulela, Foho-rua Legore no Du’ut no suku Holpilat, aldeia Nainare.
Jornalista : Celestina Teles
Editór : Cancio Ximenes
