BAUCAU, 19 agostu 2022 (TATOLI) – Konsellu Munisipál Kombatente Libertasaun Nasionál (CMCLN, sigla portugés) munisípiu Baucau, husu jerasaun foun banati tuir espíritu luta Forsa Armada Libertasaun Nasionál Timor-Leste (FALINTIL) durante tinan-24 iha ai-laran.
Sekretáriu jerál CMCLN Baucau, Manuel ‘Alari’ da Costa Soares, hateten, jerasaun foun tenke banati tuir FALINTIL iha ai-laran, maibé la lakon esperansa atu hasoru inimigu hosi nasaun boot ho arma modernu maibé ukun-aan ne’e kuda metin iha hanoin la senti ta’uk.
“Maske ita-nia rain hasoru obstákulu no problema barak maibé labele lakon pasiénsia atu kontinua kontribui ba rai-nia dezenvolvimentu, tenke hasa’e espíritu nasionalizmu haree ba pasadu durante tinan-24 hodi luta ba libertasaun nasionál,” Sekretáriu Jerál CMCLN Baucau informa ba Tatoli, iha Vila Antiga, sesta ne’e.
Alari konsidera FALINTIL nu’udar liman kro’at ba Fretin Revolusionária Timor-Leste Independente (FRETILIN) antes hasees-aan hanesan forsa independente hodi luta ba ukun rasik-aan.
Faze dahuluk iha tinan-1975 bainhira forsa Indonézia invade Timor kuaze FALINTIL sira atu mate hotu maibé hafoin muda estratéjia funu tún iha vila (Ulurbana) hamutuk ho povu ikus mai eziste to’o manán funu.
CMCLN Baucau konsidera ho selebrasaun loron FALINTIL sai momentu istóriku atu líder nasionál inklui joven sira fó liman ba malu atu hamutuk lori dezenvolvimentu ba Timor-Leste, hodi kore povu hosi problema sosiál.
“Ho matenek ne’ebé limitadu maibé sira konsege konvense, manán simpatia no hamutuk ho povu manán independénsia,” Alari akresenta.
CMCLN husu atu governu prevee osan hodi halo atividade selebrasaun loron nasionál iha munisípiu to’o postu administrativu sira nune’e bele partisipa hosi komunidade, liuliu joven sira hodi hasa’e nasionalizmu liuhosi koñesementu kona-ba istória luta rezisténsia armada durante okupasaun Indonézia.
CMCLN Baucau esforsu liuhosi proposta ba institusaun relevante sira atu selebrasaun loron FALiNTIL kria atividade ba joven sira ho objetivu halibur komunidade liuhosi jogu amizade no atividade seluk hodi aproveita fahe informasaun kona-ba prosesu luta ba libertasaun nasionál.
CMCLN rasik delega FALINTIL desmobilizadu na’in-rua hanesan Manuel Locateli Gusmão Soares ‘Lotu’ hosi postu Vemase no Lourenço Cabral ‘Maubuti’ hosi postu Quelicai reprezenta munisípiu Baucau relasiona ho pedidu Xefe Estadu Maiór Jenerál F-FDTL, Tenente Jenerál Falur Rate Laek, atu partisipa selebrasaun loron FALINTIL ba dala-47 iha nível nasionál.
Jornalista : Natalino Belo
Editór : Evaristo Soares Martins
