Konsultan Niceles aprezenta ona dezeñu finál Sentru Arkivu Istóriku ba CNC

DILI, 19 agostu 2022 (TATOLI)—Konsultan Niceles Consultant Engineering Lda, sesta ne’e, aprezenta dezeñu ka Planta no Kadernu Enkargu (BoQ) finál sentru arkivu istóriku ba Diretór Ezekutivu Centro Nacional Chega (CNC), Hugo Maria Fernandes, salaun enkontru CNC Antigu Komarka, Balide, Dili.

Notísia Relevante: CNC simu ona dezeñu finál estabelesimentu sentru arkivu hosi empreza

“Ohin, ami simu aprezentasaun dezeñu finál hosi konsultan Nicels Consultant Engineering Lda ne’ebé mak halo dezena. Tanba to’o ona faze aprovasaun finál hosi ADN no Obras Públika halo hotu ona, entaun sira mai halo aprezentasaun finál mai ami, hosi ida ne’e mak sei tama ba prosesu aprovizionamentu,” Hugo Maria Fernandes hateten ba Agência Tatoli, iha nia kna’ar fatin, Antigu Komarka, Balide.

Tuir nia, iha prosesu aprovizionamentu ne’e, CNC koordena dala ida ona ho Komisaun Nasionál Aprovizionamentu (sigla-portugués, CNA), tanba sira mak sei fó apoiu ba iha prosesu konstrusaun ne’e.

“Agora hela de’it fulan haat (4). Tanba, normál ba tinan fiskál ida-ne’e bele hateten ita loke prosesu aprovizionamentu iha fulan setembru nian sei han fulan rua atu kompleta prosesu ne’e. Tanba, kompañia sira tenke hatama (dokumentu), CNA tenke halo avaliasaun, entaun iha setembru no outubro foin mak prosesu aprovizionamentu hotu. Eentaun, iha novembru no dezembru ne’e dala ruma ema foin lori materiál mai tau no foin mak kee rai, entaun to’o tinan ikus karik bele atinje másimu 10 to’o 15% hosi prosesu konstrusaun nian. Tanba ne’e, iha tinan oin ami mós reaprópia fali osan ba tinan oin, ne’ebé konstrusaun ne’e hahú uitoan iha tinan ne’e no depois kontinua iha tinan oin,” nia dehan.

Maske nune’e, iha tinan oin mós orsamentu hot-hotu tun, entaun alokasaun orsamentu ba tinan oin mós atu kompleta tan de’it persentajen balun, entaun sei la kompleta Sentru Arkivu ne’e ba tinan oin.

Notísia Relevante: CNC sei harii sentru arkivu istóriku

“Ami-nia projesaun dala ruma konstrusaun ne’e bele kompleta iha tinan 2024, tanba haree ba alokasaun orsamentu ne’ebé Estadu fó, fazeadamente ita sei hahú hosi 2022 no 2023. Hein katak iha 2023 karik iha mudansa alterasaun ruma ba orsamentu, tanba iha eleisaun sei iha Governu foun. Klaru Governu foun sei aprezenta orsamentu retifikativu, se ami iha oportunidade bele propoin para bele kompleta tiha konstrusaun iha tinan oin maibé se lae mós hanesan, tinan oin ita sei kontinua fazeadamente iha prosesu konstrusaun. Maibé, ami hanoin katak, otimista liu bele hateten konstrusaun ne’e sei kompleta iha 2024,” diretór ne’e esplika.

Iha prosesu aprovizionamentu ba estabelesimentu sentru arkivu ne’e. empreza sira sira submete dokumentu ne’e CNA nia kompetensia tanba CAN mak orsida haree ba kustu totál ne’e loke ba kompania nasionál de’it ka kompania nasionál ho internasionál, ida-ne’e depende fali ba Komisaun Nasionál Aprosionamentu (CNA) sira mak orsida sei halo desizaun.

Ba asuntu ida-ne’e, CNC hala’o ona enkontru dahuluk hamutuk ho CNA, ADN no Sekretáriadu Grande Projetu, sira sujere ba CAN tanba CNC laiha esperiénsia ba halo konkursu públiku ba projetu ne’ebé boot, entaun di’akliu fó ba sira-ne’ebé iha ona esperiénsia mak halo.

Tanba aprzentasaun dezñu final hala’o ona mak CNC sei haruka ba CNA depois sira mak halo prosesu ne’e, tanba sira dehan bele halo iha fulan rua nia laran ho prosesu konkursu públiku ne’e lais liu mak ba fulan rua, maibé sei ba ho prosesu normál bele to’o fulan tolu.

“Tanba, sira hateten bele halo tratamentu espesiál uitoan hanesan ho RTTL, E.P nia fatin, ida-ne’e sira dehan iha fulan rua bele hetan kompañia,” nia informa.

Notísia Relevante: CNC presiza lei arkivu nasionál asegura dokumentu

Jornalista : Nelia Fernandes

Editór     : Cancio Ximenes