iklan

EKONOMIA, HEADLINE, MUNISÍPIU, OÉ-CUSSE (RAEOA)

RAEOA hatuur fatuk dahuluk ba projetu estrada nasionál Pante Makasar-Nítibe

RAEOA hatuur fatuk dahuluk ba projetu estrada nasionál Pante Makasar-Nítibe

OÉ-CUSSE, 19 agostu 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), sesta ne’e hatuur fatuk dahuluk ba projetu reabilitasaun estrada nasionál pakote I hosi ponte Noefefan, sub-rejiaun Pante Makasar liga ba Oénunu sub-rejiaun Nítibe.

Iha hatuur fatuk dahuluk ne’e akompaña hosi membru Komisaun C (Finansa Públika), Deputada Nélia Menezes.

Projetu melloramentu no reabilitasaun estrada nasionál faze primeiru hahú hosi ponte Noefefan, suku Lifau, sub-rejiaun Pante Makasar to’o Oénunu suku Suni-Ufe, sub-rejiaun Nítibe ho distánsia kilómetru 16.

“Ohin, Oé-Cusse halo avansu signifikativa ba dezenvolvimentu iha Timor-Leste, liuliu iha RAEOA, estrada hosi ponte Noefefan ba Citrana prinsipál tebes ba povu Timor-Leste, Oé-Cusse labele kontinua iha izolamentu, maibé tenke sai ona hosi izolamentu,” Arsénio Bano ko’alia iha serimónia hatuur fatuk dahuluk iha suku Lifau, Oé-Cusse.

Ezekutivu ne’e fundamenta, estrada nasionál iha rai sorin NTT komesa mellora besik fronteira Citrana iha Oépoli, nune’e Oé-Cusse lebele nonok, tán ne’e projetu ida-ne’e nia finalidade ikus atu liga Oé-Cusse ho Kupaum direitamente, nune’e bele habadak konetividade ba NTT.

Nune’e nia husu ba povu Oé-Cusse tenke avontade kontinua serbisu, tanba Oé-Cusse mak sai espelu ba rai sorin ba Timor-Leste ninian, entaun tenke hatudu ho dezenvolvimentu.

“Lansamentu ohin, hanesan istóriku ida tanba iha tinan lima kotuk ita halo estrada sira iha Oé-Cusse laran ba suku lima, ita-nia fasilidade di’ak tebes, ita sei halo ida-ne’e hanesan hosi ponte Noefefan to’o Oénunu nia kualidade sei hanesan,” nia katak.

Diretór Operasaun empreza PT Waskita Karya Tbk, Ketut Pasek Senjaya, orgullu no garante konklui projetu estrada ne’e tuir kontratu ne’ebé prevista ona entre autoridade RAEOA ho empreza Waskita Karya.

“Ohin loron nu’udar notísia di’ak, ne’ebé halo kontente ita hotu, espesialmente ba Waskita Karya, tanba ohin ita bele hatuur fatuk dahuluk, hosi Noefefan to’o Oénunu. Projetu ne’e kleur ona ita hotu hein,” nia orgullu.

Nia afirma, Waskita Karya nu’udar kompañia kontrusaun ne’ebé boot iha Indonézia, ne’ebé hakarak kontribui dezenvolve infraestruturaTimor-Leste nian, liuliu iha di Oé-Cusse.

“Atu atinje nesesidade ekipamentu sub-kontratór, Waskita Karya iha komitmentu buka sasán ne’ebé di’akliu bazea ba espesifikasaun, ekipamentu ne’ebé mai tuir tempu no prontu atu uza,” nia katak.

Distánsia konstrusaun estrada nasionál ne’e hamutuk kilómetru 16, ezekuta hosi empreza internasionál PT. Waskita Karya Tbk, ho valór kontratu millaun $23, ne’ebé autoridade RAEOA prevee hosi Orsamentu Jerál Estadu (OJE) 2022 ho durasaun serbisu durante fulan 18.

Partisipa iha serimónia ne’e, mai hosi autoridade komunitáriu no lia-na’in suku 18, akadémiku, Igreja Kátolika, veteranu inklui komunidade.

Jornalista: Abílio Elo Nini
Editór: Evaristo Soares Martins

iklan
iklan

Leave a Reply

iklan
error: Content is protected !!