OÉ-CUSSE, 20 agostu 2022 (TATOLI)–Autoridade Rejiaun Administrativa Espesiál Oé-cusse Ambeno (RAEOA), daudaun ne’e muda provizóriu estudante atoni-oan hamutuk na’in-58 hosi dormitóriu Ambeno munisípiu Díli ba Sentru Formasaun Dom Bosco, Comoro.
Reprezentante Autoridade RAEOA, Arnold Suni, informa, razaun muda estudante sira tanba daudaun ne’e empreza atu hahú halo konstrusaun foun ba dormitóriu Ambeno, nune’e autoridade koopera ho estudante sira atu husik hela dormitóriu atu halo konstrusaun foun.
“Estudante sira-ne’ebé hela iha asrama Ambeno hamutuk na’in-58, kompostu hosi feto 17 no mane 41, iha kinta ne’e ita muda ona sira no autoridade buka ona fatin provizóriu iha Dom Bosco, Comoro, hodi hela provizóriu durante fulan-lima, hahú hodi agustu to’o dezembru tinan ne’e, tanba empreza atu hadi’a asrama,” Arnoldu Suni informa ba Agência Tatoli, via telefónika, sábadu ne’e.
Notísia relevante: Arsénio Bano relata progresu setór edukasaun iha Oé-Cusse ba MEJD
Projetu ne’e Autoridade RAEOA hahú halo anúnsia rezultadu konkursu iha dezembru 2021, ho númeru kontratu, RAEOA-ZEESM TL SRF/UAL/2021-042, nune’e iha agostu tinan ne’e mak foin ezekuta tanba sei haree mós kondisaun no situasaun estudante sira-nia hela fatin.
Konstrusaun ba dormitóriu Ambeno toma-konta hosi empreza Bobolait, Unipesoál Lda, ho valór kontratu hamutuk $278.969,71, ne’ebé Autoridade RAEOA aloka hosi Orsamentu Jerál Estadu (OJE) 2021 nian.
Jornalista : Abílio Elo Nini
Editora : Julia Chatarina
