DILI, 11 Juñu 2026 (TATOLI)-Xefe Bankada Partidu Demokrátiku (PD), Manuel Henrique Noronha, apela ba kuadru no militante sira hotu atu mantein pás hodi kontribui ba dezenvolvimentu país.
Nia hato’o, mensajen ne’e iha Parlamentu Nasionál relasiona ho komemorasaun aniversáriu PD nian ba da-25 (10 Juñu 2001-10 Juñu 2026).
Tanba ne’e, bankada parabeniza ezisténsia partidu nian. Ezisténsia PD ne’ebé metin ona, tanba envolve iha primeira asembleia konstituante hodi partisipa eleisaun sira dezde dahuluk.
Xefe bankada iha oportunidade ida-ne’e hato’o ba lideransa partidu atu halo koperasaun ho partidu sira seluk no kria unidade iha estrutura partidu hodi hametin n partidu ne’e ba futuru no jerasaun sira tuirmai.
“Husu nafatin ba ita hotu, tenke iha unidade, amizade, solidariedade. Kria pás dahuluk iha ita-nia an rasik, ba família, sosiedade hodi mantein pás no estabilidade iha ita-nia rai-laran”, nia apela.
Nia dehan, ezisténsia tinan 25 sai mós momentu haree ba dezafiu sira no sai reflesaun ida, katak buat di’ak atu kontinua nafatin hodi serbí povu ho di’ak liután.
“Esperansa mak sei nafatin kolabora hamutuk ho partidu sira seluk hodi dezenvolve ita-nia rai ne’e”, afirma.
Jornalista: Nelson de Sousa
Editora: Maria Auxiliadora
