iklan

EKONOMIA, HEADLINE, MUNISÍPIU, OÉ-CUSSE (RAEOA), POLÍTIKA

Autoridade RAEOA sei konstrui postu UPF Oésilo

Autoridade RAEOA sei konstrui postu UPF Oésilo

Prezidente Autoridade RAEOA, Arsénio Paixão Bano. Imajen Tatoli/Abílio Elo Nini.

OÉ-CUSSE, 21 agostu 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), lideradu Arsénio Paixão Bano, prepara ona dezeñu no Bill Of Quantity (BoQ) atu konstrui konstrusaun foun postu integradu Unidade Patrullamentu Fronteira (UPF) iha aldeia Usapikolen, suku Bobometo, sub-rejiaun Oésilo iha tinan ne’e.

“Iha fronteira Napan, iha ona konstrusaun furak tebes hosi Indonézia nian ba sira-nia postu integradu, Oé-Cusse nia dezeñu BoQ mós prepara daudaun ona ita sei halo, la’ós atu di’akliu, la’ós atu kompete maibé ita mós tenke hatudu atu labele lakon ho rai sorin,” Arsénio Paixão Bano, ko’alia iha Oé-Cusse, domingu ne’e.

Nia informa, dezeñu tékniku sira hosi Diresaun Rejionál Infraestrutura aprezenta ba autoridade to’o dala lima mak foin aseita, tanba postu UPF ne’e atu halo tenke hatudu diferensa.

Tan ne’e maka iha fulan kotuk Governu Sentrál liuhosi Ministériu Asuntu Parlamentár no Komunikasaun Sosiál halo lansamentu ba programa Naroman ba Suku, Autoridade mós konvida ba observa ona konstrusaun ne’e nia fatin ba futuru atu halo ne’e oinsa.

“Tanba konstrusaun ne’e rasik autoridade promete ona iha tinan kotuk, haree ba nia kondisaun ladún dignu, entaun ita hatama iha planu asaun anual 2022 nian, tan ne’e dadaun ne’e ita prepara ona tempu badak iha sei prosesu tenderizasaun,” nia afirma.

Nia fundamenta, razaun atu hadi’a postu sira iha fronteira Oé-Cusse, atu minimiza atividade ilegál sira, tan ne’e postu integradu iha aldeia Kiubiselo la’o ona, postu integradu Citrana Mós la’o ona, no tinan ne’e halo tan ida iha Oésilo. Sei kontinua ba sub-rejiaun Pássabe no Pante Makasar, inklui Nítibe balu.

Jornalista: Abílio Elo Nini
Editór: Evaristo Soares Martins

iklan
iklan

Leave a Reply

iklan
error: Content is protected !!