iklan

NASIONÁL, KAPITÁL

AMD sei muda vendedór ambulante Kampung Baru ba Golgota Mall

AMD sei muda vendedór ambulante Kampung Baru ba Golgota Mall

Polísia kaer no baku vendedór ambulante na’in-rua (2) tanba kontra regra PAM Dili nian hodi faan modo-tahan iha estrada públiku iha Kampung Baru, Comoro, sesta (07/1/2022). Imajen TATOLI/António Daciparu.

DILI, 22 agostu 2022 (TATOLI)—Diretór Servisu Munisipál Jestaun Merkadu no Turizmu, Arthur Henriques, informa iha tinan ne’e Autoridade Munisípiu Dili sei muda vendedór ambulante sira-ne’ebé faan iha dalan públiku Kampung Baru, Comoro, ba Golgota Mall.

Notísia Relevante: Merkadu Manleuana Laiha Ona Espasu ba Vendedór

Prosesu atividade halo mundansa vendedór ba Golgota Mall ne’e, AMD koordena ona ho Jerente Golgota Mall, Mimi Shung, ne’ebé nia voluntáriamente fó fatin ba AMD atu halo mudansa ka diminui tiha movimentu vendedór ambulante sira faan iha Kampung Baru.

“Prosesu ida-ne’e, ami halo ona levantamentu ba iha vendedór ambulante Kampung Baru kuaze na’in-171, ida-ne’e ami sei halo aproximasaun ho Jerente Golgota Mall ho nia advogadu ne’ebé ami halo koordenasaun ona no atu kria kondisaun. Hanesan, ami ba ona identifika fatin no ami fahe ona balkaun, hanesan vendedór sira faan kada espasu ami fó metru rua-resin,” Arthur Henriques hateten ba Agência Tatoli, iha nia kna’ar fatin, Díli, segunda ne’e.

Prosesu muda vendedór Kampung Baru ba Golgota Mall, Servisu Munisipál Jestaun Merkadu no Turizmu halo kedas iha fulan hira nia laran hodi hamenus vendedór faan iha estrada públiku, maibé atividade muda vendedór ba Golgota Mall to’o agora seidauk remata tanba hein fali jerente hosi Indonézia ne’ebé agora mós aluga hela Golgota Mall.

“Tanba ne’e mak seidauk bele realiza asinatura memorandu entendimentu ida. Ida-ne’e mak halo ami seidauk bele muda ita-nia vendedór sira Golgota Mall. Aleinde ne’e, vendedór sira hosi Kampung Baru mós simu ona númeru balkaun atu bainhira vendedór sira ba hala’o atividade negósiu iha Golgota Mall buka de’it númeru balkaun no sira bele útiliza balkaun ne’e,” nia dehan.

Vendedór sira-ne’ebé muda ba Golgota Mall sei hala’o de’it atividade negósiu produtu lokál de’it no ba atividade obralan ne’e laiha fatin ba sira.

“Ita-nia negosiante sira-ne’ebé muda ba Golgota Mall, sira sei halo de’it atividade negósiu produtu lokál, ba atividade negósiu obralan la iha. Tanba, iha Golgota Mall mós halo hela atividade negósiu faan roupa. Aleinde ne’e, sira halo atividade negósiu produtu lokál ne’e ho oras tolu (3) ka haat (4) de’it, hahú hosi tuku 16h00 to’o tuku 20h00 no sira la permanente iha ne’ebá. Tanba, hanesan iha Kampung Barum sira só okupa estrada públiku no rame iha lorokraik, tanba ne’e ita organiza sira ba iha ne’ebá,” nia dehan.

Maske nune’e, Servisu Munisipál Jestaun Merkadu no Turizmu mós planu atu muda vendedór sira-ne’ebé durante ne’e halo atividade negósiu iha Merkadu Comoro ba merkadu Manleuana.

“Ita-nia vendedór sira seluk iha Merkadu Comoro mós ami planea ona, maibé prioridade ba vendedór na’in-41 ba merkadu Manleuana,” nia informa.

Kona-ba vendedór seluk, nia dehan, Autoridade Munisípiu Dili liuhosi Servisu Munisipál Jestaun Merkadu no Turizmu labele muda hotu vendedór ne’ebé durante hala’o atividade negósiu iha estrada públiku, maibé sira-nia parte sei identifika fatin iha Merkadu Manleuana no Taibesi, nune’e bele aloka negosiante sira-ne’e.

“Ba ita-nia vendedór sira seluk ne’e, ita sei haree kondisaun no identifika lai merkadu sira, karik merkadu Taibesi mak iha, ita sei muda tan vendedór sira ba iha ne’ebá,” nia hateten.

Jornalista : Nelia Fernandes

Editór       : Cancio Ximenes

iklan
iklan

Leave a Reply

iklan
error: Content is protected !!