COVID-19, HEADLINE, MUNISÍPIU, OÉ-CUSSE (RAEOA), SAÚDE

Autoridade finaliza ona projetu klínika ba moras Tuberkuloze iha Pante Makasar

Autoridade finaliza ona projetu klínika ba moras Tuberkuloze iha Pante Makasar

Projetu Klínika Tuberkuloze iha Pante Makasar konkluidu. Imajen mídia ZEESM.

OÉ-CUSSE, 22 agostu 2022 (TATOLI) – Sekretáriu Rejionál ba Asuntu Saúde iha Rejiaun Administrativa Espesiál Oé-Cusse Ambeno (RAEOA), Manuel da Costa, fó-sai katak, konstrusaun ba projetu klínika moras Tuberkuloza (TBC) ne’e autoridade harii iha suku Nipani, sub-rejiaun Pante Makasar, daudaun ne’e konklui ona nia progresu fíziku tanba atinje ona 100%.

“Iha semana kotuk, ita ba halo observa hodi fiskaliza fasilidade, autoridade harii iha suku Nipani, ita haree obra ne’e serbisu fíziku remata ona, ita bele dehan iha kualidade no serbisu tuir dezeña tuir kontratu ne’ebé sita ona iha dokumentu kontratu, tan ne’e, iha tempu badak autoridade RAEOA sei halo inaugurasaun, nune’e bele hahú halo ona funsionamentu ba atendimentu públiku,” Manuel da Costa, ko’alia iha Oé-Cusse, segunda ne’e.

Nia informa, fasilidade ne’e iha futuru sai izolamentu tanba durante ne’e pasiente moras TBC, laiha fatin propriu hodi halo kontrolu, nune’e iha futuru pasiente sira-ne’ebé afeta TBC fasil hetan tratamentu di’ak.

“Autoridade kontrui klínika izolalamentu ba moras Tuberculoze (TBC) atu separa atendimentu adekuada nune’e bele evita transmisaun hada’et iha sosiedade, no objetivu hosi fasilidade ne’e atu fó garantia ba atendimentu saúde iha RAEOA tanba futuru Hospitál Referensia Oé-Cusse, sei sai alternativa ida hodi fó satizfasaun ba komunidade no sosiedade” nia akresenta.

Nune’e mós Autoridade nia intensaun, iha futuru pesoál saúde sira bele fó tratamentu adekuada ba komunidade, ne’ebé sofre moras TBC, nune’e bele asegura tratamentu no akompañamentu, ho fasilidade adekuadu, nune’e bele senti konfortavel no rekupera hosi situasaun ne’e.

Tuir nia, RAEOA tinan barak konsulta pasiente moras TBC, iha sala izolamentu Hospitál Referénsia Oé-Cusse, tanba ne’e moras ne’e bele hada’et, entaun autoridade deside separa fatin ida, nune’e bele hetan tratamentu ketak hodi evita transmisaun ba pasiente seluk.

Projetu klínika izolamentu ba TBC ne’e ezekuta hosi empreza Tafen Kuan Unipesoál Lda, ho valór kontratu $154,551.69 hosi Orsamentu Jerál Estadu (OJE) 2021 hodi finansia fasilidade sira iha obra ne’e mak hanesan Rezidénsia ba pesoál saúde nian.

Nune’e mos sala izolamentu ba pasiente TBC hamutuk sala-sia (9), sala ba atendimentu, sala laboratóriu no sala ba farmasia inklui saneamentu ijiene kompleta ho moru.

Notísia relevante: RAEOA aloka millaun $1-resin konstrui fasilidade saúde públika

Jornalista      : Abílio Elo Nini
Editór              : Evaristo Soares Martins

iklan
iklan

Leave a Reply

iklan
error: Content is protected !!