BAUCAU, 22 agostu 2022 (TATOLI) – Bee-moos Timor-Leste, empreza publiku (BTL,ep) kompromete sei kanaliza bee-moos ba komunidade iha área Caisido, suku Tirilolo, postu administrativu Baucau vila, munisípiu Baucau.
Diretór Enjiñeiru no investimentu hosi BTL, Aleixo dos Santos, esplika, objetivu vizita inisia perfurasaun bee-moos iha área Caisido, suku Tirilolo hanesan parte konsiderasaun ba proposta hosi autoridade suku kona-ba prosesu melloramentu ba komunidade iha área refere iha futuru.
“Sei planu hamutuk ho ami-nia ekipa tekniku sira atu mai lalais atubele halo dezeñu,” Diretór Enjiñeiru no investemento informa ba Tatoli iha Caisido, segunda ne’e.
BTL rasik sei orienta tekniku sira atu halao estudu ba bee-moos refere kona-ba volume bee, pozisaun tanki rezervatóriu, sistema gratifikasaun bee-moos hosi Aubaka, Triloka hodi halo kombinasaun hamutuk no prosesu kanalizasaun bee-moos ba komunidade iha futuru.
BTL hamutuk ho autoridade suku Tirilolo konkorda deside bee-moos refere konsideradu hanesan semi-urbana katak futuru bainhira kanalizasaun sei kontribui hosi komuinidade ka benefisiariu nune’e sei utiliz halo sistema sustentabilidade naruk.
Xefi suku Tirilolo, Ricardo Ernesto Belo, esplika, vizita ekipa BTL iha perfurasaun bee-mos iha área Caisido relasiona ho rezultadu perfurasaun bee-moos hosi kompañia H20 ne’ebé hetan ajuda finanseiru hosi Governu Austrália iha área Caisido, suku Tirilolo liuliu liga ba volume bee nune’e bele estudu hodi halo kanalizasaun ba komunidade.
“Ha’u hanoin ho vizita ne’e iha rezultadu pozitivu tanba parte BTL,ep sei organiza tekniku sira atu estudu ho razaun bee ne’e sufisiente ba komunidade aldeia haat,” Ricardo Belo akresenta.
Lideransa suku Tirilolo konsidera bee-mos inportante ba komunidade iha área Caisido tanba durante tinan barak komunidade halerik ba bee-mos nune’e prontu mobiliza komunidade atu hamutuk kontribui serbisu no selu bainhira kanalizasaun ba kada uma-kain.
Perfurasaun bee-moos iha área Caisido hosi kompañia H20 ho distánsia perfurasaun to’o hetan bee hamutuk metru 79,4, bee nia aas metru 57,31, volume bee fó sai litru lima pur second.
Kanalizasaun bee-moos ne’e sei benefísia komuinidade aldeia haat iha Slsuku Tirilolo mak hanesan aldeia Lialailesu, Partarmento, Osso-Ua no Caisido hamutuk na’in-3.385 hosi uma-kain 7.024.
Jornalista : Natalino Belo
Editór : Evaristo Soares Martins
