iklan

EKONOMIA, HEADLINE

Governu halo levantamentu millaun $854,1 fundu petrolíferu hodi reforsu kaixa Estadu

Governu halo levantamentu millaun $854,1 fundu petrolíferu hodi reforsu kaixa Estadu

Osan dolar Amérika. Imajen/Espesiál

DILI, 22 agostu 2022 (TATOLI)-Governu liuhosi Ministériu Finansa (MF) to’o iha fulan daruak, trimestre datoluk nian halo ona levantamentu osan hosi fundu petrolíferu ho montante millaun $854,1 ka 33% hosi totál valór orsamentu biliaun $2,55 ne’ebé mak Parlamentu Nasionál (PN) aprova ona liuhosi Lei Oesamentu Jerál Estadu (OJE) Retifikativu 2022.

“Levantamentu ne’e Governu halo ho objetivu atu halo reforsu kaixa Estadu no bainhira iha tan nesesidade maka Governu sei hato’o tan pedidu levantamentu ba Banku Sentrál Timor-Leste (BCTL, sigla portugés),” refere nota ne’ebé Agência Tatoli asesu, segunda ne’e.

Tanba levantamentu ne’e liu ona Rendimentu Sustentável Estimadu (RSE) ba tinan 2022 ho montante millaun $554,1, maka Governu liuhosi Primeiru-Ministru notifika ona PN kona-ba pedidu levantamentu ne’e.

Taxa ezekusaun reál OJE Retifikativu 2022 ba Administrasaun Sentrál esklui Seguransa Sosiál no Rejiaun Administrativa Espesiál Oé-cusse Ambeno (RAEOA), ezekuta ona 24% ka millaun $758,5 hosi totál orsamentu retifikativu biliaun $3,1, to’o iha loron 31 jullu.

Notísia relevante: Governu ezekuta ona millaun $597,7 hosi OJE Retifikativu 2022

Governu daudaun ne’e kontinua elabora Proposta OJE 2023 no tuir planu Konsellu Ministru sei aprova alokasaun orsamentu tuir programa iha loron 31 agostu no Proposta Projetu Lei (PPL) OJE 2023 iha loron 15 setembru molok entrega PPL OJE 2023 ba PN iha loron 01 outubru hodi hakat ba diskusaun no votasaun iha PN iha novembru 2022.

Kalendáriu elaborasaun OJE 2023 ne’e tuir ona espíritu lei foun enkuadramentu orsamentál ne’ebé mak sai baze ba Reforma Jestaun Finanseira Públika.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!