iklan

HEADLINE, INKLUZAUN SOSIÁL, MUNISÍPIU

Governu konkorda família haloot ruin saudozu Francisco Borja iha Fatuberliu

Governu konkorda família haloot ruin saudozu Francisco Borja iha Fatuberliu

Saudozu Francisco Borja da Costa. Imajen/Espesiál

DILI, 22 agostu 2022 (TATOLI)—Sekretáriu Estadu Asuntu Kombatente no Libertasaun Nasionál, Júlio da Conceição ‘Loro Mesak’, hateten, família deside haloot ruin saudozu Francisco Borja da Costa iha munisípiu Manufahi ne’ebé nu’udar rai moris fatin saudozu nian.

“Família la konkorda iha jarín eroi Metinaro. Família halo ona momentu ida iha Fatuberliu ne’ebé haloot saudozu iha ne’ebá,” Governante ne’e hateten hafoin reuniaun ho Primeiru-Ministru (PM), Taur Matan Ruak, iha Rezidénsia Farol, segunda ne’e.

Aleinde ne’e, família mós rejeita atu halo teste forensik ba restu mortál Saudozu Borja nian.

“Uluk família koko ba kee ona maibé la hetan, foin lalais família halo fali kultura ikus mai hetan, ne’ebé kee tiha ona, lori ona ba Manufahi. Ema hotu hatene katak ne’e saudozu Borja, maibé bele halo teste filafali maibé família konkorda ita bele submete ba teste,” nia klarifika.

Notísia relevante: Família hetan ona restu mortál saudozu Francisco Borja da Costa

Família saudozu Francisco Borja da Costa kee ona saudozu nia ruin iha jardim Largo Lecidere maibé hetan de’it ruin pedasuk, iha loron domingu (21/08).

Matebian mate iha tempu invazaun loron 07 dezembru 1975 no oras ne’e halo tinan 47 husik família.

Biografia Poeta Borja da Costa

Francisco Borja da Costa moris iha Fatuberlio iha kosta sul Timor-Leste iha loron 14 outubru 1946 no nia mate ho tinan 30 bainhira Timor-Leste hetan invazaun hosi tropa Indonézia iha loron 07 dezembru 1975 ne’ebé oho hosi tropás parakedista Indonézia.

Bainhira Revolucão dos Cravos mosu iha Lisboa iha loron 25 abril 1974, Borja da Costa iha Portugal no hala’o estájiu profisionál iha ‘Diario de Noticias’ Iha Lisboa, nia haknaar no hela hamutuk ema Timor-Leste seluk iha Casa dos Timorenses, sentru ida ba nasionalista Timor-Leste iha li’ur.

Durante iha Portugal, Borja da Costa nia espíritu literáriu revolusionáriu hakroat liután liuhosi nia leitura ba obra eskritór famozu sira, tuir hakerek na’in ne’ebé iha influénsia boot mak Bertold Brecht, Pablo Neruda, Maxim Gorky, ‘knaar Marxista’ no poezia Mao Tsetung nian.

Borja da Costa nu’udar lia-na’in ida ne’ebé “hakerek poezia iha forma klásika, iha lia-Tetum. Nia imajen sira ne’e hotu kona-ba buat murak sira Timor nian; foho tutun maka kleuk tun sa’e, manu sira iha knua laran, kona-ba mota sira ne’ebé fahe malu no hamutuk fila-fali ho laiha rohan laek.”

Borja da Costa hahú tenta atu fanun timor-oan sira hodi “loke matan didi’ak hodi haree realidade katak sira moris iha ukun koloniál nia okos “bainhira nia fila hikas tiha mai ona hosi Lisboa iha tinan 1974.

Hamutuk ho nia maluk Abílio Araújo iha Fretilin ne’ebé nia rasik halo parte, sira “kria poezia no hananu ne’ebé fo sai hanoin nasaun povu Timor ne’ebé kleur tebes ona moris iha hanehan laran. Sira muda hananu tradisionál. Knaar ba dahuluk hosi rarosan ida-ne’e mak poezia “Foho Ramelau” ne’ebé tuir mai sai hanesan “hananu revolusaun Fretilin nian.”

Nune’e mós, Borja da Costa kontribui nia obra “Pátria, Pátria” ba hino nasionál Timor-Leste nian. Bainhira independénsia Timor-Leste nian deklara unilateralmente iha loron 28 novembru, tinan 1975, hino ne’e hananu ba dahuluk públikamente.

Jornalista    : Antónia Gusmão

Editora         : Julia Chatarina

iklan
iklan

Leave a Reply

iklan
error: Content is protected !!