Konstrusaun memoriál masakre santa cruz la’o neneik
DILI, 22 agostu 2022 (TATOLI)–Sekretáriu Estadu Asuntu Kombatente no Libertasaun Nasionál, Júlio da Conceição ‘Loro Mesak’, hateten, projetu konstrusaun fíziku memoriál masakre santa cruz la’o hela maibé neneik.
“Projetu la’o hela maibé neneik, maibé konserteza iha selebrasaun loron masakre santa cruz 12 novembru tinan ne’e konstrusaun ne’e seidauk hotu kuandu seidauk bele kontinua to’o tinan oin bele finaliza,” Sekretáriu Estadu hateten hafoin reuniaun ho Xefe Governu, iha Rezidénsia Farol, segunda ne’e.
Notísia relevante: 12 novembru, Governu sei hatuur fatuk dahuluk ba Monumentu 12 Novembru
Nia dehan, kontratu ba projetu ne’e ho durasaun tinan-ida maibé to’o tempu mak seidauk finaliza bele prolonga.
“Neneik ne’e iha empreza, tanba ne’e mak ami bolu atensaun ona ba empreza ne’ebé ezekuta obra no sira hasoru ona ami, maibé sira hateten katak tinan ne’e seidauk bele finaliza entaun ami husu sira tenke finaliza iha tinan oin,” nia esklarese.
Bainhira bolu jerente empreza hodi klarifika, empreza aprezenta razaun katak téknikamente sira fraku atu aselera projetu ne’e maibé promete tinan oin bele finaliza.
“Ami labele esklui sira tanba sira agora kontinua hela serbisu maski neneik, ne’ebé husik sira halo serbisu maibé fó hanoin ba sira atu aselera serbisu lalais oituan,” nia tenik.
Projetu ne’e ezekuta hosi empreza Bobolait ho orsamentu millaun $1,385, ne’ebé tuir kontratu konstrusaun sei hahú iha loron 23 setembru 2021 no sei ramata iha loron 22 setembru 2022.
Jornalista : Antónia Gusmão
Editora : Julia Chatarina
