VIQUEQUE, 22 agostu 2022 (TATOLI)–Sentru Saúde postu Uatucarbau, munisípiu Viqueque, hahú fulan janeiru to’o jullu rejista moras Insfesaun Respiratoriu Aguda (ISPA) hamutuk 1.000.
“Hahú hosi fulan-janeiru to’o jullu, ami rejista kazu moras ho númeru a’as liu maka ISPA ho totál 1.000. Ami mós rejista kazu moras sira seluk hanesan kulit katar no moras malária,” Xefe sentru saúde Uatucarbau, Jeremias Mota, hateten iha postu Uatucarbau, segunda ne’e.
Xefe sentru saúde ne’e dehan, kada tinan kazu ISPA labele redús tanba moras ne’e hosi fatór ambiente no klima bailoron.
“Atu halo lakon kazu ISPA defísil. Ha’u hanoin tratamentu médiku ne’e baibain mosu isin manas no fó sintoma. Ami fó hanoin ba pasiente sira atu hemu bee morna beibeik tanba hemu bee barak sei lakon,” nia akresenta.
Notísia relevante: Janeiru to’o juñu, MS rejista pasiente ISPA iha territóriu nasionál 139,638
Aleinde ne’e, dezafiu ne’ebé sentru saúde Uatucarbau enfrenta maka rede internet tanba daudaun utiliza sistema online. Entaun pedidu medikamentu sira tenke liuhosi online maibé rede internet maka ladún di’ak.
“Ami hasoru difikuldade maka rede internet tasik tanba daudaun uza sistema online hotu. Kuandu ami hato’o pedidu ruma tenke liuhosi online, maibé rede maka sempre difikulta ami iha postu Uatucarbau,” nia relata.
Aleinde ne’e, iha difikuldade ba estrada tanba moras ruma iha suku hanesan iha Bahata ambulánsia ba difísil asesu estrada.
“Ambulánsia bá ladi’ak, entaun ami tenke transporta ba munisípiu Baucau tanba ami-nia dalan maka ladi’ak,” nia tenik.
Jornalista : Vitorino Lopes da Costa
Editora : Julia Chatarina
