DILI, 22 agostu 2022 (TATOLI)–Embaixadór Timor-Leste iha Brunei Darusalam, Abel Guterres, segunda ne’e, lori ajénsia Timorense Manpower Agency (TMA) hasoru Primeiru-Ministru (PM), Taur Matan Ruak, hodi ko’alia kona-ba kampu traballu.
“Mai ho delegasaun hosi Brunei ko’alia ho Primeiru-Ministru kona-ba oinsá mak bele halo investimentu iha Timor-Leste no mós esplika kona-ba atu lori joven timor-oan sira ba serbisu iha Brunei, ne’e foin dahuluk timor-oan sira bele ba serbisu iha nasaun sira nu’udar membru Asosiasaun Nasaun Sudeste Aziátiu (ASEAN, sigla inglés) nian,” Embaixadór Timor-Leste iha Brunei Darusalam, Abel Guterres, hateten hafoin ho ekipa hasoru Xefe Governu iha Rezidénsia PM, Farol, segunda ne’e.
Notísia relevante: Brunei apoia adezaun TL ba ASEAN
Diplomata timor-oan ne’e dehan, seidauk bele esklarese barak tanba prosesu sei la’o hela, nune’e bainhira timor-oan sira sa’e ona aviaun bá mak bele festeza susesu ne’e.
“Prosesu sei la’o hela, tanba sei halo rekrutamentu, importante maka timor-oan sira ne’e molok arranka tenki asina ona kontratu, katak buat hotu loos ona mak bele ba to’o iha Brunei ema sei simu sira nu’udar nasaun ida ninia ema no kuidadu to’o sira filafali mai Timor,” nia akresenta.
Embaixadór subliña, ajénsia TMA hosi Brunei mak sei halo rekrutamentu no sei simu timor-oan sira selesionadu iha Brunei, nune’e buka serbisu ba timor-oan sira ne’e, no kuidadu to’o fila hikas mai Timor hodi serbisu iha Brunei durante tinan-rua.
“Joven timor-oan sira, feto no mane lalika preokupa tanba Brunei ne’e rai kiik, hafoin ninia ema mós di’ak tebes tanba ita kuaze ko’alia lian indonéziu, sira ko’alia lian melaiu no ingles ne’ebé ita-nia ema ba iha ne’ebá sente hanesan sira-nia uma,” nia tenik.
Timor-oan sira ne’ebé sei ba serbisu iha Brunei iha área ospitalidade iha otel, restaurante, konstrusaun, to’os no natar, maibé hahú uluk iha ospitalidade.
Jornalista : Antónia Gusmão
Editora : Julia Chatarina
