29 agostu, MAE sei lansa konstrusaun UKL+ tipu A iha Balibo
DILI, 23 agostu 2022 (TATOLI)—Diretora Ezekutivu programa Nasionál Dezenvolvimentu Suku (PNDS), Claudinha Soares Pinto, hateten iha 29 agostu semana oin Ministériu Adminitrasaun Estatál (MAE) sei lansa konstrusaun Uma Kbiit Laek Plus (UKL+) tipu A iha Balibo, Bobonaro.
Notísia Relevante: Governu sei identifika uma-kain 6.000 sai benefisiáriu UKL+
“UKL+ tipu A ami sei halo lansamentu iha 29 agostu. Bainhira ami hahú lansamentu signifika ami hahú implmenta atividade regulár ne’e no ita planu sei lansa iha Balibo, Bobonaro,” Diretora PNDS ne’e informa ba Agência Tatoli, iha nia kna’ar fatin Comoro, Dili.
UKL tipu A ultrapa sa no aprova ona ho benefisiáriu hamutuk 1000 no kada postu iha benefisiáriu 75 no iha Dili laran mak 80.
Enkuantu UKL tipu B, sei lansa iha setembru 2022 tanba sei presiza autoridade lokál sira halo ezersísiu hodi diminui númeru benefisiáriu sira.
“UKL+ tipu B, ita-nia tarjetu ba benefisiáriu 5.000 maibé lista ne’ebé iha hamutuk 12.000 entaun autoridade lokál sira presiza halo ezersísiu para dimunui tanba barak liu,” nia dehan.
Tuir planu, konstrusaun Uma Kbiip Laek Plus (UKL+) tipu B ne’e, sei lansa iha munisípiu Viqueque.
Antes ne’e, Ministru Administrasaun Estatál (MAE), Miguel Pereira de Carvalho, hateten Uma Kbiit Laek Plus (UKL+) ne’e ekipa MAE sei distribui materiál konstrusaun ba benefisiáriu sira iha fulan-agostu 2022.
Iha fulan-jullu tinan ne’e, ekipa MAE tuun ona ba terrenu atu halo identifikasaun ba komunidade nia uma iha Teritórriu Nasionál, hafoin ne’e iha fulan-setembru bele halo ona konstrusaun UKL+ ba benefisiáriu sira.
Diretór Jerál Dezenvolvimentu Rurál Ministériu Administrasaun Estatál (MAE), Rosito Guterres, hateten programa UKL+ fahe ba tipu A mak uma ne’ebé aat totál no persiza halo kontrusaun foun, maibé tipu B ne’e ba uma ne’ebé aat kmaan, persiza reabilitasaun hanesan troka kalen sira ne’ebé aat ona no seluk tan.
Tuir Governu nia estimativa ba UKL+ tipu A ne’e benefisiáriu hamutuk 1.000 no UKL+ ho tipu B ita sei identifika benefisiáriu hamutuk 5.000, maibé ida-ne’e ita fahe de’it materiál ba sira depois mak sira halo mesak.
Kona-ba benefisiáriu hosi UKL+ ho tipu A, nia esplika, Governu sei aloka osan hamutuk $3.000 ba kada uma-kain hodi halo kontrusaun.
Notísia Relevante: Programa UKL+ iha faze verifikasaun no hein aprovasaun lista benefisiáriu
Jornalista : Osória Marques
Editór : Cancio Ximenes
