DILI, 23 agostu 2022 (TATOLI)—Xefe Departamentu Emerjénsia Hospital Nasionál Guido Valadares (HNGV), Flavio José Boavida, informa asidente ne’ebé akontese iha Dare ne’e Maromak bolu hikas Pe. Abito José Brites Casemiro, tanba hetan pankada maka’as iha parte ulun.
“Ita-nia médiku hosi HNGV simu Pe. Abito iha 09h10 kalan iha banku urjénsia, ne’ebé lori hosi familia no ema ne’ebé hetan iha fatin akontesimentu iha Dare. Depois kuandu tama ona emerjénsia, Amu laiha sintóma hosi iis moris nian no amu tama mai ho fuan paradu. Atu Bele dehan katak amu mai iha HNGV ne’e ho kondisaun mate. Tanba, tuir ita-nia mediku sira haree katak liu tiha besik minutu 30 ba oras ida mate ona mak foin lori mai iha emerjénsia,” Flávio José Boavida hateten ba Agência Tatoli, liuhosi telefónika, tersa ne’e.
Tuir nia, amu ne’e hetan asidente iha parte Dare nian tanba ne’e evakuasaun hosi fatin akontesimentu lori mai iha emerjénsia ne’e, médiku sira sei halo atendimentu ba kondisaun labele salva ona, tanba amu hetan pankada maka’as iha nia ulun no kakutak sai iha parte kotuk.
“Ida-ne’e diagnóstika, hosi médiku sira dehan amu-nia ulun ruin nakfera makaas iha parte kotuk. Tanba ida-ne’e konsidera hanesan kazu emerjénsia, tama ho tama halo atendimentu direta no médiku sira mós deteta ba nia fuan paradu, entaun sira halo deklarasaun ba nia família katak labele salva amu nia moris.
Maske nune’e, nia haktuir, iha emerjénsia HNGV médiku sira sei hamoos no hosi ne’e médiku sira koko durante minutu 10 to’o 15 mak hafoin sira halo deklarasaun.
Entretantu, Pe. Abito José Brites Casimiro, hosi oan Jeferino Casemiro no Saturnina Martins. Amu iha maun no alin na’in-10, mane tolu no feto hitu (7). Enkuantu, Pe. Abito José Brites Casemiro oan ba da-haat (4) hosi maun-alin na’in-10 ne’e.
Pe. Abito José Brites Casemiro moris iha Hatulia-Ermera iha loron 06 fevereiru 1985 no mate iha 22 agostu 2022.
Tuir karta komunikadu ne’ebé Agência Tatoli asesu hosi Arkidioseze Metropolitana Dili ne’e haktuir, Nai Maromak bolu hikas ona Pe. Abito José Casemiro hanesan formadór iha semináriu Maiór São Pedro e São Paulo, Fatumeta, Dili, iha segunda (22/08) 2022.
Daudaun ne’e padre nia mate-isin iha hela mortuáriu Hospital Nasionál Guido valadares (HNGV) hodi submete ba iha investigasaun polísia nian, nune’e bele hatene loloos kona-ba nia mate. Tuir informasaun, matebian hetan asidente ho motor iha dalan parte Dare nian.
Tuir programa Arkidioseze Dili, korpu prezente padre nian sei ba hatuur iha Semináriu Maiór São Pedro e São Paulo Fatumeta, Dili, no selebrasaun Santa Misa no funerál sei fó sai iha biban tuir mai.
Jornalista : Nélia Fernandes
Editór : Cancio Ximenes
