BOBONARO, 23 agostu 2022 (TATOLI) – Asidente tráfegu motorizada xoke ema la’o-ain ne’ebé akontese iha dalan protokolu aldeia Palaka, suku Sanirin, postu administrativu Balibo, munisípiu Bobonaro, iha loron-tersa, tuku 07:00 dadeersan rezulta ema na’in-rua mate.
Komandante Operasaun PNTL munisípiu Bobonaro, Inspetór xefe Armando Silva, informa asidente ne’e envolve motorista ida konduz motorizada marka versa (metan) ho xapa-matríkula 0.2353 hosi diresaun Maliana atu ba kapitál Dili xoke inan feton la’o-ain ida.
Iha asidente ne’e motorista ho naran Lourenço Tavares (57), nu’udar profesór hosi aldeia Tas-Masak, suku Saburai, postu administrativu Maliana, mate iha fatin kedas tanba oin rahun hotu. Enkuantu vítima Maria Madalena idade 60 ba leten hosi Palaka, suku Sanirin, postu administrativu Balibo ne’e iis sei iha.
Hafoin akontese, komunidade no polísia eskudra Balibo ne’ebé destaka iha Batugade to’o kedas iha lokalidade akontesimentu atu halo salvasaun no kontaktu kedas ambulánsia iha sentru saúde Balibo no evakua urjente ba Hospital Referál Maliana (HRM) maibé la konsege salva tanba hetan pankada maka’as.
Notísia relevante: Asidente tráfegu iha Maliana rezulta motorizada ida rahun
“Tuir informasaun ne’ebé ami hetan iha terrenu katak, ema-ne’ebé mak konduz motorizada nia hakotu kedas iis iha lokalidade asidente, depois vítima ne’ebé maka hetan xoke hosi motorista ne’e mos konsege evakusa mai ospitál maibé la konsege salva vida, signifika asidente ne’e rezulta ema na’in-rua mak mate,” nia informa ba Jornalista sira, iha kna’ar- fatin, tersa ne’e.
Ekipa seksaun tránzitu seguransa roduviária junta ho komandante eskuadra Batugade daudaun ne’e asegura ona motorizada no rekolla hela informasaun iha terrenu atu hatene motivu loloos hodi asidente ne’e.
“Motorista ne’e ninia karta kondusaun ho dukumentu kompletu, depois ita-nia inan feton ne’ebé sai vítima ne’e mos hanesan ema agrikultór ida-ne’ebé nia la’o-ain iha estrada mak motorizada xoke nian, maibé tanba dezastre ita hotu la espera atu akontese,” Armando hateten.
Daudaun ne’e mate-isin profesór Lourenço Tavares transporta ona ba ninia rezidénsia iha suku Tapo-Memo, postu administrativu Maliana hodi hala’o serimónia funebre tuir lisan Bunak nian. Enkuantu inan feton Maria Madalena nia isin mate daudaun ne’e prepara ona atu transporta ba Palaka.
Relasiona ho akontesimentu ne’e, Komandante ne’e apela ba utente roduviáriu sira inklui ema la’o-ai bainhira utiliza dalan públiku sira tenke kumpre nafatin regra tránzitu no lei kódigu estrada nune’e bele hadook-aan hodi asidente trófegu.
Jornalista: Sérgio da Cruz
Editór: Evaristo Soares Martins
